«Боруссия» «Генк» жартылай қорғаушысын қатарға қосуға жақын

Sky Deutschland таратқан мәліметке сәйкес, «Боруссияның» спорт директоры Нильс-Оле Бук 18 жастағы шабуылшы жартылай қорғаушының трансфері бойынша «Генкпен» келіссөздерге толық көңіл бөліп отыр. Осы мәмілені аяқтау үшін ол команданың Азиядағы маусымалды турнесіне де бармайды.

Бельгиялық клуб қаржылық талаптарын төмендетуге ниетті емес. «Генк» футболшы үшін кемінде 35 миллион еуро алуды көздеп отыр, ал бонустарды қоса есептегенде трансфер құны 40 миллион еуроға дейін жетуі мүмкін.

Соңғы мәліметтерге қарағанда, «Боруссияның» 35 миллион еуролық ұсынысы қабылданбаған. Соған қарамастан, неміс клубы Карецаспен 2031 жылдың маусымына дейін есептелген жеке келісімшарттың шарттарын келісіп қойған.

Бұған дейін грек жартылай қорғаушысына «Милан» да қызығушылық танытқан. Алайда дортмундтық клубтың белсенді әрекеті италиялықтардың Еуропадағы ең дарынды жас ойыншылардың бірі үшін күресін қиындатты.

Өткен маусымда Константинос Карецас барлық турнирде 49 матч өткізіп, 3 гол соғып, 18 нәтижелі пас берді. Сондай-ақ ол Грекия ұлттық құрамасы сапында 10 матчқа қатысып, 3 гол мен 1 нәтижелі пастың авторы атанды.