D-тобы: АҚШ, Парагвай, Австралия, Түркия

АҚШ құрамасы

ФИФА рейтингіндегі орны: 16

Әлем чемпионаттарындағы үздік нәтижесі: үшінші орын (1930)

Бас бапкері: Маурисио Почеттино (Аргентина)

2026 жылғы әлем чемпионатын ұйымдастыратын негізгі елдердің бірі саналатын АҚШ құрамасына, бәлкім, бүкіл мундиальдағы ең теңгерімді топ түсті. Дегенмен америкалықтарға жеребе қатты қолайлы болды деу де қиын.

АҚШ құрамасы D тобында кез келген команда бірінші орын алуы да, соңғы орында қалуы да мүмкін квартетке түсті.

«Жұлдызды-жолақтылардың» басты артықшылығы – өз алаңында ойнауы. Бірақ үйдегі жағдай оларға айтарлықтай көмектеседі дегенге толық кепілдік жоқ. 1994 жылы да әлем чемпионаты АҚШ жерінде өткен. Сол кезде алаң иелері топтан зорға шықты, оның өзінде қосымша көрсеткіштердің арқасында ғана. Ал плей-оффтың алғашқы кезеңінде болашақ чемпион Бразилияға жол берді.

АҚШ құрамасының әлем чемпионаттарындағы ең жоғары жетістігі бір ғасырға жуық уақыт бұрын тіркелген. Олар 1930 жылы Уругвайда өткен алғашқы мундиальда қола жүлдегер атанған. Бірақ бұл оқиғаның болғанына соншалық көп уақыт өтті, қазір тіпті ертегі сияқты естіледі.

Қазіргі АҚШ құрамасы – мықты әрі теңгерімді команда. Бірақ әзірге одан артық айту қиын. Құрамда «Ювентус» ойыншысы Уэстон Маккенни мен «Милан» футболшысы Кристиан Пулишич секілді танымал есімдер бар. Дегенмен оларды өз клубтарының сөзсіз көшбасшысы деу қиын.

«Жұлдызды-жолақтылардың» ең жарық жұлдызы – бас бапкер Маурисио Почеттино десек те болады. 54 жастағы аргентиналық маман Англия премьер-лигасындағы «Тоттенхэм» және «Челси», сондай-ақ Францияның ПСЖ клубындағы жұмысымен жақсы танымал. Ал АҚШ құрамасы – оның ұлттық командадағы алғашқы тәжірибесі. Әзірге ол бұл ұжыммен 2025 жылғы КОНКАКАФ Алтын кубогының финалына дейін жетті.

Парагвай құрамасы

ФИФА рейтингіндегі орны: 40

Әлем чемпионаттарындағы үздік нәтижесі: ширек финал (2010)

Бас бапкері: Густаво Альфаро (Аргентина)

Бұл оңтүстікамерикалық команда соңғы үш әлем чемпионатын өткізіп алды. Бірақ енді тек осы турнирге ғана емес, келесі мундиальға да қатысатынына кепілдік алды. 2030 жылғы әлем чемпионаты Испания, Португалия және Мароккода өтсе де, Парагвай, Аргентина және Уругвай құрамалары турнирдің бір-бір матчын қабылдайды. ФИФА-ның бұл шешімі парагвайлықтарға автоматты түрде жолдама береді.

Ал алдағы әлем чемпионатына «гуарани» «қараңғы ат» мәртебесінде барады. Аргентиналық тағы бір бапкер Густаво Альфаро шәкірттерінен не күтуге болатыны әзірге толық түсініксіз. Айта кетейік, Альфаро 2022 жылғы әлем чемпионатында Эквадор құрамасын жаттықтырып, топтан шыға алмады.

Қазіргі Парагвай құрамасында аты аңызға айналған қақпашы Хосе Луис Чилаверт немесе «Бавариямен» Чемпиондар лигасын жеңген әйгілі шабуылшы Роке Санта Крус секілді ерекше тұлғалар жоқ.

Ұлттық құраманың қазіргі ойыншыларының басым бөлігі Америка құрлығында – Бразилия, Аргентина және MLS лигасында өнер көрсетеді. Бұл парагвайлықтар үшін белгілі бір артықшылық болуы мүмкін. Себебі олардың көбі климат пен уақыт белдеуіне тез бейімделеді.

Қалай болғанда да, Парагвайды D тобының айқын аутсайдері деп санауға болмайды. Ұжымның топтағы барлық қарсыласына лайықты қарсылық көрсететіні анық.

Австралия құрамасы

ФИФА рейтингіндегі орны: 27

Әлем чемпионаттарындағы үздік нәтижесі: 1/8 финал (2006, 2022)

Бас бапкері: Тони Попович

Австралия құрамасы географиялық тұрғыдан біртүрлі көрінсе де, соңғы 20 жыл бойы азиялық команда саналып келеді. Дәл АФК іріктеуі арқылы олар қатарынан бесінші әлем чемпионатына жолдама алды.

Төрт жыл бұрын олар мундиальдағы ең үздік нәтижесін қайталап, 1/8 финалға шықты. Бірақ Германиядағыдай, Катарда да плей-оффтың алғашқы кезеңі Австралия үшін соңғы аялдама болды.

Қызығы, екі жағдайда да «жасылдар» болашақ әлем чемпиондарына жол берді. 2006 жылы Италиядан, 2022 жылы Аргентинадан ұтылды. Оның үстіне екі кездесуде де австралиялықтар соңына дейін шайқасып, бар болғаны бір доп айырмасымен жеңілді.

Айтпақшы, 2006 жылғы Германиядағы турнирде қазіргі бас бапкер Тони Попович те ойнаған. Алайда оның сол мундиальдағы қатысуы Бразилияға қарсы матчтағы 40 минутпен ғана шектелді. Кейін бұрынғы қорғаушы жарақатына байланысты алаңнан кетуге мәжбүр болды.

Қазір оның қол астында шебер, бірақ жұлдызды деңгейге жете қоймаған ойыншылар жиналған. Дегенмен Австралия құрамасы барлық уақытта командалық ойын мен тәртіпті әрекетімен ерекшеленген. Сондықтан бұл ұжым АҚШ-та да 1/8 финалға дейін жете алады. Тек бұл жолы ол плей-оффтың бірінші емес, екінші кезеңі болмақ.

Түркия құрамасы

ФИФА рейтингіндегі орны: 22

Әлем чемпионаттарындағы үздік нәтижесі: үшінші орын (2002)

Бас бапкері: Винченцо Монтелла (Италия)

Сену қиын, бірақ Түркия құрамасы үшін Солтүстік Америкадағы әлем чемпионаты XXI ғасырдағы небәрі екінші, ал жалпы тарихындағы үшінші мундиаль болмақ.

Олар өздері үшін ең сәтті өткен әлем чемпионатынан кейін бірде-бір мундиальға қатыса алмады. 2002 жылғы әлем біріншілігінде олар шынымен де керемет нәтиже көрсетіп, қола жүлдегер атанды.

Сол турнирде үшінші орын үшін матчта түріктер жарыс қожайындарының бірі Оңтүстік Кореяны 3:2 есебімен жеңді. Ал олардың құраманың шабуылшысы Хакан Шүкүр сол кездесудің 11-секундында есеп ашып, әлем чемпионаттары тарихындағы ең жылдам голдың авторы атанды.

Одан кейін Түркия құрамасы Еуропа чемпионаттарында бірнеше рет жарқ етті. Еуро-2008-де қолаға қол жеткізіп, Еуро-2024-те ширек финалға дейін жетті. Бірақ әлем чемпионатына бірде-бір рет қатыса алмады.

Қазір түрік жанкүйерлері үлкен үмітке толы. Бұл бекер емес. Олар қазіргі құрамды 24 жыл бұрын бүкіл футбол әлемін таңғалдырған командамен салыстырып жүр. Тіпті кейбіреулер бүгінгі Түркия сол құрамнан да мықты деп санайды.

Шынында да, 2026 жылғы Түркия құрамасы топ-клубтарда ойнайтын, әрі сол жерде маңызды рөл атқаратын футболшылардан құралған. Қақпада – «Манчестер Юнайтед» өкілі Алтай Байындыр, орта алаңда – «Интер» жұлдызы Хакан Чалханоглу. Ал шабуылдағы екі жас дарын ерекше назар аудартады. Олар – «Ювентус» форварды Кенан Йылдыз және мадридтік «Реал» ойыншысы Арда Гюлер.

Түркия құрамасын италиялық маман Винченцо Монтелла жаттықтырады. «Аэроплан» лақап атымен танымал 51 жастағы бапкердің өзі де 2002 жылғы әлем чемпионатына Италия құрамасы сапында қатысқан. Демек, ол сол кездегі тамаша түрік шеберлерінің ойынын өз көзімен көрген. Бірақ араға ширек ғасырға жуық уақыт салып, дәл осы елдің құрамасын мундиальға бапкер ретінде бастап барамын деп ойламағаны анық.

2026 жылғы әлем чемпионатында Түркия шын мәнінде таңғалдыруы мүмкін. Бірақ екі түрлі сценарий бар: олар турнир торымен өте алысқа да баруы ықтимал, немесе эмоцияға беріліп, топтан шыға алмай қалуы да мүмкін. Дегенмен екінші нұсқа аса ықтимал көрінбейді.

Қызығы, топтық кезеңнің екінші турында Парагвайға қарсы матчтан бір күн бұрын Монтелланың туған күні. Түрік футболшылары бапкеріне қандай сыйлық дайындайды екен?

АҚШ – Парагвай 13 маусым, 06:00

Австралия – Түркия14 маусым, 09:00

АҚШ – Австралия 20 маусым, 00:00

Түркия – Парагвай 20 маусым, 08:00

Түркия – АҚШ 26 маусым, 07:00

АҚШ – Австралия 26 маусым, 07:00

*Қазақстан уақытымен