Де Минор Шанхайдағы «Мастерс» турнирінің ширек финалына шықты
Фото: ATP
Австралиялық теннисші Алекс де Минор Шанхайда өтіп жатқан ATP-1000 санатындағы турнирдің ширек финалына жолдама алды. Ол төртінші айналымда ресейлік Карен Хачановты жеңді.
13 қазанда өткен кездесу 6:3, 6:4 есебімен аяқталды. Де Минор әр сетте бір брейк жасап, бірінші партияның сегізінші, ал екінші сетте үшінші геймінде қарсыласының сервисін алды.
Матч барысында австралиялық теннисші үш эйс жасап, бір рет қос қателік жіберді. Ол үш брейк-пойнттың екеуін сәтті пайдаланды. Хачанов та үш эйс орындап, қос қателікке жол берген жоқ. Алайда қарсыласының сервисін алу үшін берілген жалғыз мүмкіндігін пайдалана алмады.
Де Минор Шанхайдағы «Мастерс» турнирінің ширек финалына екінші жыл қатарынан шығып отыр. 2025 жылы да ол осы кезеңге дейін жеткен. Сонымен қатар өткен аптада австралиялық теннисші Бейжіңдегі ATP-500 турнирінің финалына шыққанымен, жарақатына байланысты Новак Джоковичке қарсы шешуші матчты аяқтай алмады.
Ширек финалда де Минор Германия өкілі Александр Зверев пен қазақстандық Александр Бубликтің арасындағы кездесудің жеңімпазымен ойнайды. Бұл матч 13 қазанға жоспарланған.
Айта кетейік, Шанхайдағы «Мастерс» турнирі 7-18 қазан аралығында хард корттарында өтеді. Жарыстың жүлде қоры — 9,4 миллион доллар. Турнирдің қазіргі чемпионы — Монако өкілі Валантен Вашеро.