Геннадий Головкиннің Альвареспен жекпе-жектегі жеңілісі және Мұхаммед Әлидің соңғы жеңісі: спорт тарихында бүгін болған оқиғалар

Қазақстан

«Астана» тарихи жетістікке жетті

2015 жыл – осы күні «Астана» клубы УЕФА Чемпиондар лигасының топтық кезеңінде дебют жасады. Лиссабондағы «Эштадиу да Луш» стадионында өткен матчта елордалық команда алаң иесі «Бенфикадан» 0:2 есебімен жеңілді. Голдарды Николя Гайтан (51-минут) мен Костас Митроглу (51-минут) соқты. «Астана» Чемпиондар лигасының топтық кезеңінде өнер көрсеткен алғашқы қазақстандық клуб атанды.

Геннадий Головкин Сауль Альварестен жеңілді

2018 жыл – осы күні Лас-Вегаста мексикалық Сауль Альварес пен қазақстандық Геннадий Головкин арасындағы әйгілі трилогияның екінші жекпе-жегі өтті. Кездесу төрешілердің көпшілік шешімімен Альварестің пайдасына аяқталды – 114:114, 113:115, 113:115.

Реваншта орта салмақтағы WBC, WBA Super және IBO чемпиондық белбеулері сарапқа салынды. GGG мен «Канело» рингте 12 раундтың барлығын өткізді. Бұл Головкиннің кәсіпқой рингтегі алғашқы жеңілісі болды.

Альварес пен Головкин алғаш рет 2017 жылдың қыркүйегінде кездескен. Ол жекпе-жекте төрешілер тең нәтижені тіркеп, қос боксшы да чемпиондық атақтарын сақтап қалған еді.

Әлем

Теннис тарихынан

1923 жыл – осы күні америкалық теннисші, жазушы әрі журналист Билл Тилден АҚШ-тың Ұлттық теннис чемпионатында (қазіргі US Open) төртінші рет жеңіске жетті. Финалда ол отандасы Билл Джонстонды 6:4, 6:1, 6:4 есебімен ұтты. Тилден мансабында АҚШ чемпионатында жеті рет топ жарған.

Мұхаммед Әлидің соңғы жеңісі

1978 жыл – осы күні бокс тарихындағы ұлы спортшылардың бірі Мұхаммед Әли Жаңа Орлеанда өткен турнирде америкалық Леон Спинксті төрешілердің бірауызды шешімімен жеңіп, ауыр салмақтағы WBA және The Ring чемпиондық белбеулерін қайтарып алды.

Спинкс пен Әли арасындағы алғашқы жекпе-жек сол жылдың ақпан айында өткен. Ол кезде «Ұлы» лақап атымен танылған боксшы төрешілердің бөлінген шешімімен жеңіліп, WBC белбеуінен айырылған еді.

Автоспорт жұлдыздары Бельгия Гран-приінде жеңіс тұғырына көтерілді

1985 жыл – осы күні атақты бразилиялық автокөлік жарысының шебері, Формула-1-дің үш дүркін чемпионы Айртон Сенна (Lotus-Renault) Бельгия Гран-приінде жеңіске жетті.

Жарыста екінші орынды Williams-Honda командасының британдық пилоты Найджел Мэнселл иеленсе, үздік үштікті Формула-1-дің төрт дүркін чемпионы, француз Ален Прост түйіндеді. Жарыс Бельгияның Спа қаласындағы «Спа-Франкоршам» автодромында өтті.

Сиднейде Олимпиада ойындары басталды

2000 жыл – осы күні Австралияның Сидней қаласында XXVII Олимпиада ойындарының салтанатты ашылу рәсімі өтті. Австралия тарихына арналған спорттық қойылымның атқарушы продюсері Рик Берч, ал көркемдік жетекшісі әрі режиссері Дэвид Аткинс болды.

Дәстүрлі Ұлттық парадқа 199 елдің спортшылары қатысты. Олимпиада алауын 1996 жылғы Атланта Олимпиадасының күміс жүлдегері, австралиялық жеңіл атлет Кэти Фримен жақты.

Кейін Фримен 400 метрге жүгіруден алтын медаль жеңіп алып, Олимпиада алауын жаққан және сол ойындарда жарыста жеңіске жеткен тарихтағы алғашқы спортшы атанды.

Федерер дәуірінің соңы

2022 жыл – осы күні әлемдегі ең атақты әрі титулды теннисшілердің бірі Роджер Федерер мансабын аяқтайтынын жариялады.

Федерер мансабындағы соңғы матчты Лэйвер кубогі аясында Рафаэль Надальмен жұптасып өткізді. Олар супер тай-брейкте америкалық Джек Сок пен Фрэнсис Тиафодан 6:4, 6:7, 9:11 есебімен жеңілді.

Роджер Федерер – «Үлкен дулыға» турнирлерінің 20 дүркін чемпионы және Дэвис кубогінің (2014) иегері. Ол ATP рейтингінде 310 апта бойы бірінші орында тұрды.

Бұл күні дүниеге келгендер

1919 жыл – Фаусто Коппи, италиялық велошабандоз, «Джиро д’Италияның» бес дүркін және «Тур де Франстың» екі дүркін жеңімпазы.

1978 жыл – Эйдур Гудьонсен, исландиялық футболшы, шабуылшы. Исландия құрамасының Колбейнн Сигторссон және Гюльфи Сигурдссонмен қатар үздік сұрмергендерінің бірі. Англияның «Челси» және Испанияның «Барселона» клубтарындағы өнерімен танымал.