Исмағұлов пен Қасымбайдың Алматыдағы жеңістері және Серенаның ауыр жеңілісі

Қазақстан:

Исмағұлов пен Қасымбай жанкүйерлерін қуантты

2024 – бұл күні Алматыда Hardcore Fighting Championship аралас жекпе-жек турнирі өтті. Кештің басты жекпе-жегінде қазақстандық Мұратбек Қасымбай UFC-дің бұрынғы жауынгері, бразилиялық Диего Брандаоны екінші раундта техникалық нокаутпен жеңді. Жартылай жеңіл салмақтағы кездесу бес раундқа жоспарланған еді, ал бәске BHF («Ең медиалық файтер») титулы қойылды.

Кештің қосалқы басты жекпе-жегінде Дамир Исмағұлов өнер көрсетті. Ол UFC-ден кеткеннен кейінгі екінші кездесуін өткізді. Үш раундқа созылған айқаста Исмағұлов ресейлік Дмитрий «Армеец» Климовты төрешілердің бірауыздан шығарған шешімімен жеңді.

Әлем:

Футбол тарихынан

1930 – бұл күні Уругвайда тарихтағы алғашқы футболдан әлем чемпионаты басталды. Әлем чемпионаттары тарихындағы алғашқы екі матч бір уақытта басталып, Франция Мексиканы 4:1, ал АҚШ Бельгияны 3:0 есебімен жеңді. Франциялық Люсьен Лоран әлем чемпионаттары тарихындағы алғашқы голдың авторы атанды. Ал 30 шілдеде өткен финалда Уругвай құрамасы Аргентинаны 4:2 есебімен жеңіп, алғашқы чемпион болды.

Канадалық ұшқыштың жеңісі

1997 – бұл күні Williams командасының канадалық пилоты Жак Вильнёв Ұлыбритания Гран-приінің жеңімпазы атанды. Жарыс Сильверстоун трассасында өтті. Екінші орынды француз Жан Алези, үшінші орынды австриялық Александр Вурц иеленді. Екеуі де Benetton-Renault командасында өнер көрсеткен.

Уимблдон Симона Халепке бағынды

2019 – бұл күні румыниялық теннисші Симона Халеп Уимблдон турнирінің жеңімпазы атанды. Ол аңызға айналған америкалық теннисші Серена Уильямсты 6:2, 6:2 есебімен небәрі 55 минутта сенсациялық түрде жеңді.

Германияның әлем чемпионатындағы төртінші титулы

2014 – бұл күні Бразилияның Рио-де-Жанейро қаласындағы «Маракана» стадионында футболдан әлем чемпионатының финалы өтті. Германия құрамасы қосымша уақытта Аргентинаны 1:0 есебімен жеңді. Шешуші голды Андре Шюррленің пасынан кейін Марио Гётце соқты. Финал кезінде Гётцеге 22 жас 39 күн болған, ол соңғы 48 жылдағы финалда жеңіс голын соққан ең жас ойыншы атанды. Германия құрамасы төрт рет әлем чемпионы атанып, бұл көрсеткіш бойынша бес титулы бар Бразилиядан кейінгі екінші орында тұр.

UFC-дегі найзағайдай жылдам жеңіс

2019 – бұл күні Сакраменто қаласында өткен UFC Fight Night турнирінің басты жекпе-жегінде бұрынғы жартылай жеңіл салмақ чемпионы Жермейн де Рандами америкалық Аспен Лэддты небәрі 16 секундта техникалық нокаутпен жеңді. Жекпе-жек жеңіл салмақта өтті.

Бұл жеңіліс америкалық спортшы үшін мансабындағы алғашқысы болды. Бір күн бұрын Лэдд салмақ өлшеуден әрең өткен, ал оның жағдайы жанкүйерлер мен мамандар арасында үлкен күмән тудырған еді. Мүмкін, бұл оның сәтсіздігіне әсер еткен болар.

Кейін Аспен Лэдд Калифорния штатының Атлетикалық комиссиясына жекпе-жек нәтижесін жою туралы өтініш білдірді. Ол төреші Херб Дин жекпе-жекті тым ерте тоқтатты деп есептеді. Алайда комиссия оның талабын қанағаттандырмады.

Бұл күні дүниеге келгендер:

2007 – Ламин Ямаль, испаниялық футболшы, «Барселона» клубы мен Испания құрамасының вингері, Еуропа чемпионы (2024).

1985 – Гильермо Очоа, мексикалық футболшы, қақпашы, Олимпиада ойындарының қола жүлдегері (2020), КОНКАКАФ Алтын кубогының бірнеше дүркін жеңімпазы.

1918 – Альберто Аскари, атақты италиялық автогонщик, Формула-1 жарысының екі дүркін чемпионы (1952, 1953).