КСРО Еуропаны бағындырды, «Астана» жеңіске жетті, Дычко нокаутпен ұтты: спорт тарихындағы 10 шілде

Қазақстан

Алматыдағы бокс кеші

2021 жыл – осы күні Алматыдағы Балуан Шолақ атындағы Спорт сарайында үлкен бокс кеші өтті. Кештің басты жекпе-жегінде қазақстандық Сұлтан Заурбек төрешілердің бірауыздан шығарған шешімімен Ұлыбритания өкілі Ронни Кларкты жеңіп, екінші жеңіл салмақтағы WBO European чемпиондық белбеуін иеленді.

Сол турнир аясында Олимпиада ойындарының екі дүркін қола жүлдегері Иван Дычко кәсіпқой бокстағы оныншы жеңісіне қол жеткізді. Ол бірінші раундта ресейлік ардагер Денис Бахтовты әсерлі нокаутқа жіберді.

«Астананың» жарқын жеңісі

2011 жыл – осы күні қазақстандық «Астана» велокомандасының шабандозы Фредрик Кессякофф «Тур Австрия» көпкүндік жарысының жеңімпазы атанды. Екінші орынды Team NetApp командасының өкілі, чехиялық Леопольд Кёниг иеленсе, үшінші орынға Geox-TMC сапындағы испаниялық Карлос Састре тұрақтады. «Астана» жарыста жеке және командалық есепте де топ жарды.

Әлем

КСРО-ның тарихи жеңісі

1960 жыл – осы күні КСРО мен Югославия құрамалары футболдан алғашқы Еуропа кубогының (қазіргі Еуропа чемпионаты) финалында кездесті. Тартысты өткен матчта кеңестік құрама 2:1 есебімен жеңіске жетті. 43-минутта Милан Галич есеп ашқанымен, қақпада аңызға айналған Лев Яшин сенімді ойын көрсетті. 49-минутта Слава Метревели таразы басын теңестірсе, жеңіс голын Виктор Понедельник соқты. Осылайша, КСРО Еуропаның алғашқы чемпионы атанды.

«Канело» аргентиналық қарсыласына мүмкіндік қалдырмады

2010 жыл – осы күні мексикалық боксшы Сауль Альварес аргентиналық Лучиано Коэльомен титулдық жекпе-жек өткізді. «Канело» жартылай орта салмақтағы WBC Silver белбеуін қорғады. 12 раундқа жоспарланған кездесу алтыншы раундта техникалық нокаутпен аяқталды.

Мессидің ұлттық құрамадағы алғашқы ірі трофейі

2021 жыл – осы күні Аргентина құрамасы капитаны Лионель Мессимен бірге бірнеше сәтсіз әрекеттен кейін Америка кубогын жеңіп алды. Рио-де-Жанейродағы «Маракана» стадионында өткен финалда аргентиналықтар Бразилияны 1:0 есебімен ұтты. Жалғыз голды 22-минутта Анхель Ди Мария соқты. Бұл Месси үшін ұлттық құрама сапындағы алғашқы ірі халықаралық трофей болды.

Эшли Барти Уимблдонның жаңа жұлдызына айналды

2021 жыл – осы күні аустралиялық теннисші Эшли Барти мансабында алғаш рет Уимблдон чемпионы атанды. Финалда ол чехиялық Каролина Плишкованы 6:3, 6:7, 6:3 есебімен жеңді. Барти Уимблдон кубогын Аустралияға Ивонн Гулагонг-Коулидің жеңісінен кейін араға 41 жыл салып қайта әкелді. Келесі жылғы турнир Қазақстан үшін тарихи болды – Елена Рыбакина Уимблдон чемпионы атанды.

Португалия Роналдусыз Еуропа чемпионы болды

2016 жыл – осы күні Португалия құрамасы тарихында алғаш рет Еуропа чемпионы атанды. Париждегі «Стад де Франс» стадионында өткен финалда португалиялықтар Францияны қосымша уақытта 1:0 есебімен жеңді. Финалдың басты драмасы Криштиану Роналдудың ауыр жарақаты болды. Ол 25-минутта көз жасына ерік беріп, алаңнан кетуге мәжбүр болды. Соған қарамастан, Португалия Францияның шабуылдарына төтеп беріп, 109-минутта Эдердің голының арқасында жеңіске жетті.

Француз боксшысы чемпиондық белбеуінен қалай айырылды

1970 жыл – осы күні италиялық Бруно Аркари жартылай жеңіл салмақтағы WBC чемпиондық атағын қорғап қалды. Оның қарсыласы, франциялық Рене Роке алтыншы раундтан кейін баспен соққы жасағаны үшін дисквалификацияланды.

АҚШ әйелдер құрамасының әлем чемпионатындағы триумфы

1999 жыл – осы күні АҚШ-тағы «Роуз Боул» стадионында әйелдер арасындағы әлем чемпионатының финалы өтті. Турнир қожайындары Қытай құрамасын пенальтилер сериясында жеңді. Негізгі және қосымша уақытта есеп ашылған жоқ. Шешуші пенальтиді Брэнди Честейн сәтті орындады. Бұл матчқа 90 185 көрермен жиналып, әйелдер спортындағы ең көп көрермен келген жарыстардың бірі ретінде тарихқа енді.

Осы күні дүниеге келгендер

1945 жыл – Вирджиния Уэйд, Ұлыбританияның теннисшісі және спорт комментаторы. Жекелей және жұптық сында «Үлкен дулыға» турнирлерінің жеті дүркін жеңімпазы. 1989 жылы Халықаралық теннис даңқы залына енгізілді.

1985 жыл – Марио Гомес, Германия құрамасының шабуылшысы. «Бавария» сапында УЕФА Чемпиондар лигасының жеңімпазы, әлем және Еуропа чемпионаттарының жүлдегері.