К-тобы: Португалия, Өзбекстан, Колумбия,Конго ДР

Португалия құрамасы

ФИФА рейтингіндегі орны: 5

Әлем чемпионаттарындағы ең үздік нәтижесі: қола жүлдегер (1966)

Бас бапкері: Роберто Мартинес (Португалия)

Португалия құрамасы үшін бұл қатарынан жетінші әлем чемпионаты болмақ. Ал соңғы жиырма жылдың өзгермес көшбасшысы Криштиану Роналду алтыншы мәрте мундиальда өнер көрсеткелі отыр. Осылайша, Роналду кәсіби мансабында қатысуға мүмкіндігі болған бірде-бір әлем чемпионатын жіберіп алған емес. Алайда құрамында осындай деңгейдегі жұлдыз болғанына қарамастан, португалиялықтар әзірге әлем чемпионаттарында жүлдегерлер қатарына ене алған жоқ.

Олар медальға ең жақын 2006 жылғы әлем біріншілігінде келді. Сол кезде Криштиану бастаған команда үшінші орын үшін өткен кездесуде турнир қожайыны Германиядан жеңіліп қалған еді.

Ал Португалия құрамасының әлем чемпионаттарындағы ең жоғары жетістігі осыдан тура 60 жыл бұрын тіркелген. 1966 жылы Эйсебио бастаған команда қола жүлдеге қол жеткізген болатын. Бүгінде Роналду аңызға айналған Эйсебионы ұлттық құрама сапындағы матч саны және гол көрсеткіші бойынша әлдеқашан басып озды.

CR7 есебінде қазір 141 гол бар. Оның үстіне, ол әлем чемпионаттарының бес бірдей финалдық кезеңінде гол соққан тарихтағы жалғыз футболшы болып саналады.

Дегенмен Криштианудың барлық жетістігі мен шеберлігін мойындасақ та, биыл ақпанда ол 41 жасқа толды. Сондықтан оның жанкүйерлері де футболшының ең үздік кезеңі артта қалғанын түсінуі керек. Ендігі басты міндет – бас бапкер Роберто Мартинестің Роналдуды командаға салмақ емес, шешуші сәттерде тәжірибесімен көмектесетін көшбасшы ретінде тиімді пайдалана білуі.

Еуро-2024 турнирінде мұндай тепе-теңдік табыла қойған жоқ. Көп жағдайда Мартинестің Роналдуға шектен тыс сенім артуы салдарынан Португалия ширек финалда жарыс жолынан шығып қалды.

Соған қарамастан, құраманың әлеуеті өте жоғары. Витинья, Нуну Мендеш, Жоау Канселу, Рубен Диаш, Бернарду Силва, Бруну Фернандеш, Гонсалу Рамуш, Педру Нету секілді жұлдыздар бұл команданы әлемдегі ең мықты ұжымдардың біріне айналдырып отыр. Тіпті мұндай ойыншылар шоғырланған құрамамен қазіргі таңда Бразилия, Франция немесе Испания құрамаларының өзі мақтана алмайды.

Сондықтан Португалияның АҚШ, Канада және Мексикада өтетін әлем чемпионатындағы мақсаты біреу ғана – чемпион атану.

Топтық кезеңдегі қарсыластары да қолайлы. Сондықтан португалиялықтар плей-оффқа дейін күшін дұрыс бөліп, бабын келтіруге мүмкіндік алады. Әйтсе де бірінші орын алғаны тиімді, өйткені онда 1/16 финалда өзге топтарда үшінші орын алған командалардың бірімен кездеседі.

Өзбекстан құрамасы

ФИФА рейтингіндегі орны: 50

Әлем чемпионаттарындағы мәртебесі: дебютант

Бас бапкері: Фабио Каннаваро (Италия)

К тобы қазақстандық жанкүйерлер үшін ерекше қызығушылық тудырады. Себебі бұл топта тек Криштиану Роналдудың командасы ғана емес, көршілес Өзбекстан құрамасы да өнер көрсетеді.

Өзбекстанның әлем чемпионатына жолдама алуы бүкіл ел үшін үлкен мереке болды. Енді өзбек футболшыларына тек өз отанында ғана емес, бүкіл Орталық Азияда жанкүйер болатындар көп.

«Ақ қасқырлар» тарихқа өз есімдерін жазып үлгерді. Бірақ бұл тарихтың аяқталғанын білдірмейді. Керісінше, Солтүстік Америкадағы мундиаль олардың жетістіктерін жаңа деңгейге көтеруі мүмкін.

Әлем чемпионатындағы алғашқы қатысуына қарамастан, Өзбекстан құрамасын тәжірибесіз деуге болмайды. Командада Еуропаның мықты лигаларында өнер көрсетіп жүрген әрі клубтық деңгейде жетістіктерге жеткен ойыншылар жеткілікті.

Олардың қатарында Элдор Шомуродов, Аббосбек Файзуллаев, Рустам Ашурматов және Абдуқодир Хусанов бар. Ал ұлттық құраманың ең үлкен жұлдызы, бәлкім, футболшылардың өзі емес, бас бапкері шығар. Фабио Каннаваро әлем чемпионы атанған ойыншы ғана емес, 2006 жылғы «Алтын доп» иегері. Сонымен қатар бапкер ретінде Қытай чемпионаты мен Суперкубогын жеңіп алған.

Әрине, Өзбекстанға Португалиямен тең дәрежеде бәсекелесу оңай болмайды. Бірақ бұл мүмкін емес деген сөз емес. Нидерланд құрамасына қарсы жолдастық кездесуде өзбек футболшылары соңғы минуттарға дейін лайықты қарсылық көрсетті. Голландиялықтар жеңісті тек тоғызыншы қосымша минутта соғылған пенальти арқылы жұлып әкеткен еді – 2:1.

Бұл матч Өзбекстан құрамасының ешкімнен қаймықпайтынын көрсетті. Олар физикалық тұрғыдан да, психологиялық жағынан да кез келген қарсыласпен тайталасуға дайын.

Сондықтан көршілерімізге жанкүйер болып, олардың плей-офф кезеңіне шығатынына сенейік.

Колумбия құрамасы

ФИФА рейтингіндегі орны: 13

Әлем чемпионаттарындағы ең үздік нәтижесі: ширек финал (2014)

Бас бапкері: Нестор Лоренсо (Аргентина)

Колумбия құрамасы әрдайым жарқын ойыншыларымен ерекшеленіп келеді. Қазіргі буын да бұл дәстүрді жалғастырып отыр. Әсіресе шабуыл шебі өте қауіпті. Джон Кордоба, Хуан Эрнандес және Луис Диас қарсыластар үшін үлкен қауіп төндіреді.

Алайда колумбиялықтардың басты мәселесі – олардан үнемі жоғары нәтиже күтеді. Бірақ команда бұл үмітті жиі ақтай бермейді. Тіпті кейбір жағдайларда әлем чемпионатының финалдық кезеңіне де жолдама ала алмай қалады.

XXI ғасыр басталғалы бері Колумбия алты әлем чемпионатының төртеуіне қатыса алмады. Оның ішінде Қатардағы ӘЧ-2022 де бар.

Соған қарамастан, дәл осы кезеңде олар өз тарихындағы ең үздік нәтижеге қол жеткізді. 2014 жылы Бразилияда өткен әлем чемпионатында ширек финалға дейін жетті. Ал ӘЧ-2026 турниріне колумбиялықтар Америка кубогының күміс жүлдегері ретінде келеді. 2024 жылғы құрлықтық додада олар финалға дейін жеткенімен, шешуші кездесуде Аргентинаға қосымша уақытта жол берді.

Колумбияның плей-оффқа шығуға мүмкіндігі жоғары. Бірақ ол үшін ойыншылар жанкүйерлердің үлкен үмітінен қысылмай, еркін ойнауы қажет.

Егер команда өз футболын көрсете алса, турнирде алысқа баруы әбден мүмкін. Ал керісінше жағдайда топтық кезеңнен өте алмау қаупі де жоқ емес.

Конго Демократиялық Республикасы құрамасы

ФИФА рейтингіндегі орны: 45

Әлем чемпионаттарындағы ең үздік нәтижесі: топтық кезең (1974)

Бас бапкері: Себастьен Десабр (Франция)

Белгілі бір деңгейде Конго Демократиялық Республикасын әлем чемпионатының дебютанты деуге болады. Өйткені олардың жалғыз қатысуы 1974 жылы Заир атауымен өткен. Ол турнирді жергілікті жанкүйерлердің еске алғысы келмейтіні анық. Германиядағы әлем чемпионатында команда үш матчтың бәрінде жеңіліп, жалпы есепте 0:14 көрсеткішімен турнирдің ең әлсіз құрамасы атанған еді. Содан бері Заир де, кейінгі Конго ДР құрамасы да әлем чемпионатына қатыса алған жоқ.

Африка Ұлттар кубогында да олардың жетістігі көп емес. 1974 жылғы чемпиондықтан кейін тек 1998 және 2015 жылдары қола медаль жеңіп алған.

1/16 финалға шығудың өзі үлкен жетістік саналады. Құрамда тәжірибелі ойыншылар бар. Мәселен, «Бетис» шабуылшысы Седрик Бакамбу мен «Вест Хэм» қорғаушысы Аарон Уан-Биссака.

Алайда Бакамбу өткен маусымның көп бөлігін жарақатпен өткізсе, Уан-Биссака өнер көрсеткен «Вест Хэм» ағылшын чемпионатында сәтсіз маусым өткізді.

Топтағы қарсыластарымен салыстырғанда Конго құрамасының тағы бір әлсіз тұсы – бас бапкері. Себастьен Десабр кәсіби футболшы ретінде де, бапкер ретінде де айтарлықтай табысқа жеткен жоқ. Ал ұлттық құрамалар деңгейінде әзірге ешқандай ірі трофей жеңіп көрмеген.

Сондықтан Конго ДР үшін ең шынайы мақсат – топта үшінші орын алып, плей-оффқа жолдамаға таласу. Бірақ ол үшін қарсыластарының кем дегенде біреуінен басым түсуі қажет. Ал мұны жүзеге асыру оңай болмайды.

17 маусым, 22:00 – Португалия – Конго ДР

18 маусым, 07:00 – Өзбекстан – Колумбия

23 маусым, 22:00 – Португалия – Өзбекстан

24 маусым, 07:00 – Колумбия – Конго ДР

28 маусым, 04:30 – Конго ДР – Өзбекстан

28 маусым, 04:30 – Колумбия – Португалия

Уақыт Астана қаласының уақыты бойынша көрсетілген