Калафьори Англия Суперкубогында 58 жылдағы ең жылдам голды соқты
«Арсенал» ФК
Лондондық «Арсеналдың» қорғаушысы Риккардо Калафьори Англия Суперкубогы тарихындағы 1968 жылдан бергі ең жылдам голдың авторы атанды.
Итальяндық футболшы «Манчестер Ситиге» қарсы кездесудің 23-секундында есеп ашты. Калафьори Майлз Льюис-Скеллидің пасынан кейін шабуылды дәл соққымен аяқтады. Opta мәліметінше, бұған дейін Англия Суперкубогы матчында ойынның алғашқы минутында гол соғу 58 жыл бұрын тіркелген.
1968 жылы мұндай жетістікке «Манчестер Ситидің» шабуылшысы Бобби Оуэн «Вест Бромвичке» қарсы кездесуде қол жеткізген. Осылайша, Калафьори соңғы 58 жылдағы турнирдегі ең жылдам голдың авторы болды.
«Арсенал» «Манчестер Ситиді» 3:0 есебімен жеңіп, Англия Суперкубогын жеңіп алды. Калафьориден бөлек, Кай Хаверц пен Мартин Эдегор да гол соқты.
Бұл трофей «Арсеналдың» клуб тарихындағы 18-ші Суперкубогы болды. Сонымен қатар, лондондықтар «Манчестер Ситиге» қарсы трофей үшін өткен матчтардағы 100 пайыздық көрсеткішін сақтап қалды. Команда төрт кездесудің барлығында жеңіске жеткен.
Айта кетейік, өткен маусымда Микель Артетаның командасы АПЛ чемпионы атанып, Чемпиондар лигасының финалына дейін жетті. Алайда шешуші кездесуде «Арсенал» ПСЖ-ға пенальти сериясында жол берді.