Хьюстондағы әйгілі «Жыныстар шайқасы» және Грег Луганистің таңғажайып тарихы: спорт тарихында бұл күн

Автоспорт тарихынан

1969 жыл – осы күні Brabham-Ford командасының бельгиялық пилоты Жаки Икс Канада Гран-приінің жеңімпазы атанды. Жарыста екінші орын оның командаласы, Формула-1-дің үш дүркін чемпионы, австралиялық Джек Брэбемге бұйырды. Үздік үштікті Lotus-Ford командасының австриялық пилоты Йохен Риндт түйіндеді. Жарыс «Моспорт-Парк» автодромында өтті.

Мұхаммед Әлидің Нью-Йорктегі жеңісі

1972 жыл – осы күні Нью-Йорктегі «Мэдисон-сквер-гарден» аренасында америкалық бокстың қос аңызы Флойд Паттерсон мен Мұхаммед Әли арасында реванш өтті. Паттерсон кейін Майк Тайсонның жаттықтырушысы атанды. Жекпе-жекте NABF нұсқасы бойынша аса ауыр салмақтағы чемпиондық белбеу сарапқа салынды.

Жетінші раундта Паттерсонның көзінің айналасы қатты ісініп, қабағы жарылды. Осыған байланысты жекпе-жек тоқтатылды. Осылайша, Паттерсон «Ұлыдан» екінші рет жеңілді.

Олардың алғашқы кездесуі 1965 жылдың 22 қарашасында өткен еді. Ол кезде аса ауыр салмақтағы әлем чемпионы атағы сарапқа салынып, Әли Паттерсонды 12-раундта техникалық нокаутпен жеңген.

Мұхаммед Әлиден екінші рет жеңілгеннен кейін Паттерсон кәсіпқой бокс мансабын аяқтады. Оның қоржынында 55 жеңіс (оның 40-ы нокаутпен) және 8 жеңіліс болды.

Билли Джин Кингтің тарихи жеңісі

1973 жыл – осы күні әйгілі америкалық теннисші Билли Джин Кинг Хьюстондағы Astrodome стадионында мансабын аяқтаған АҚШ ашық чемпионатының екі дүркін жеңімпазы Бобби Риггсті атақты «Жыныстар шайқасында» 6:4, 6:3, 6:3 есебімен жеңді.

Билли Джин Кингпен кездескенге дейін Бобби Риггс әйелдер ерлермен бірдей деңгейде теннис ойнап, соған сай гонорар алмауы керек, «ас үйде отырып, бала тәрбиелеуі тиіс» екенін дәлелдеуге бірнеше рет әрекет жасаған.

Риггс Билли Джин Кингпен кездесуді 1970-жылдардың басынан бері талап етіп келген. Тіпті оған дейін әлемнің сол кездегі бірінші ракеткасы Маргарет Кортты 6:1, 6:2 есебімен жеңген еді. Алайда бұл жеңіс Риггсті қанағаттандырмай, ол Билли Джинмен матч өткізу талабын жалғастырды.

29 жастағы жас әрі атақты теннисші 55 жастағы ардагерге матчқа қатысушылардың әрқайсысы 100 мың доллардан гонорар алуы, ал жеңімпазға қосымша 100 мың доллар төленуі шартын қойды.

Матчтан кейін Риггс Билли Джин Кингтің шеберлігін жоғары бағалап, реванш өткізуді талап етті. Алайда екінші кездесу ұйымдастырылмады. Кейін екі теннисшінің арасында ұзақ жылдарға созылған достық қарым-қатынас орнады.

Билли Джин Кингтің жеңісі теннисте жаһандық өзгерістерге жол ашты. Сол жылы Әйелдер теннисі қауымдастығының (WTA) халықаралық деңгейде мойындалуы орын алды.

Ауырсынуға қарамастан жеңіске жетті

1988 жыл – осы күні америкалық суға секіруші Грег Луганис мансабындағы Олимпиададағы үшінші алтынын жеңіп алды. Сеул Олимпиадасында ол 3 метрлік трамплиннен суға секіру жарысында қытайлық Тан Ляньдэ (704,88 ұпай) мен Ли Дэляннан (665,28) озып, финалда 730,80 ұпай жинады.

Осыдан бір күн бұрын іріктеу кезеңінде Луганис сәтсіз секіріп, басын трамплинге соғып алған. Соның салдарынан басы жарылып, миы шайқалды. Спортшы бірнеше минут бойы су бетіне шықпай қалған. Дәрігерлер оның басына бірнеше тігіс салды, ал медициналық үзіліс жарты сағатқа созылды.

Қатты ауырсынуға қарамастан, Луганис жарысты жалғастырды.

Жапониядағы турнирдегі жарқын нокаут

2014 жыл – осы күні Жаңа Зеландияның ММА спортшысы Марк Хант Жапонияда өткен UFC Fight Night 52 турнирінің екінші раундында америкалық Рой Нельсонды нокаутқа түсірді.

Бұл ауыр салмақта өткен кештің басты жекпе-жегі болды. Екі спортшы да «Кештің үздік өнер көрсетуі» үшін 50 мың доллар көлемінде сыйақы алды.

Ferrari пилоттары Сингапур Гран-приінде дубль жасады

2015 жыл – осы күні Ferrari командасының неміс пилоты, Формула-1-дің төрт дүркін чемпионы Себастьян Феттель Сингапур Гран-приінде жеңіске жетті.

Жарыста екінші орынды Red Bull-Renault командасының австралиялық пилоты Даниэль Риккардо иеленді. Үздік үштікті Ferrari сапындағы финляндиялық Кими Райкконен түйіндеді.

Жарыс Сингапурдағы «Марина-Бей» қалалық автодромында өтті.

Бұл күні дүниеге келгендер

1971 жыл – Хенрик Ларссон, швед футболшысы және жаттықтырушысы. 1994 жылғы әлем чемпионатының қола жүлдегері (АҚШ), «Барселона» құрамында 2005/06 маусымында Чемпиондар лигасының жеңімпазы. 2001 жылғы «Алтын бутсы» иегері.

1980 жыл – Густав Ларссон, швед велошабандозы. 2008 жылы Бейжің Олимпиадасында жекелей уақытқа жарыста күміс жүлдегер атанған.

1988 жыл – Хабиб Нурмагомедов, танымал ресейлік аралас жекпе-жек шебері, UFC-дің жеңіл салмақтағы бұрынғы чемпионы. 2022 жылдың наурызында UFC Даңқ залына енгізілді.