Мессидің әдемі хет-тригі мен Рыпакованың Ашхабадтағы алтыны: спорт тарихындағы бұл күн

Қазақстан:

Ольга Рыпакованың Түрікменстандағы триумфы

2017 – осы күні Қазақстанның ең атақты жеңіл атлеттерінің бірі Ольга Рыпакова Түрікменстан астанасы Ашхабадта өткен жабық ғимараттағы және жауынгерлік өнер түрлерінен V Азия ойындарында ұзындыққа секіруден алтын медаль жеңіп алды. Рыпакова үшінші мүмкіндігінде 6,43 метрге секірді. Екінші орынды Вьетнам спортшысы Буй Тхи Тху Тао (6,36 метр) иеленді. Үндістандық Нена Варакил 6,04 метр нәтижесімен қола жүлдеге қол жеткізді.

«Қайраттың» Чемпиондар лигасының негізгі кезеңіндегі дебюті

2025 – осы күні алматылық «Қайрат» Чемпиондар лигасының жалпы кезеңіндегі алғашқы матчында лиссабондық «Спортингтен» 1:4 есебімен жеңілді. Ойын Португалиядағы «Жозе Алваладе» стадионында өтті. Голдарды Тринкау (44, 64-минуттар), Сантос (66), Кенда (68) және Эдмилсон (86) соқты.

Әлем:

Джо Луис Нью-Йоркте әдемі нокаут жасады

1946 – осы күні атақты америкалық боксшы Джо Луис отандасы Тами Мориеллоны бірінші раундта нокаутқа түсірді. Осы жеңісінің арқасында Луис ауыр салмақтағы әлем чемпионы атағын қорғады. Жекпе-жек Нью-Йорктегі «Янки Стэдиум» аренасында өтті. Бұл Джо Луистің чемпиондық белбеуін 23-рет қорғауы еді.

Формула-1 Гран-приіндегі қайғылы қаза

1953 – осы күні 26 жастағы бельгиялық ақсүйек әрі автокөлік жүргізушісі Шарль де Торнако қаза тапты. Оның Ferrari көлігі Италияның солтүстігіндегі Модена Гран-приіне дейінгі жаттығу кезінде аударылып кеткен. Жас пилот ауруханаға бара жатқан жолда көз жұмды. Шарль де Торнако 1920-жылдары жарыстарға қатысқан барон де Торнакодан туған.

Мадридтік «Реалдың» жарқын жеңісі

1968 – осы күні мадридтік «Реал» «Сантьяго Бернабеу» стадионында Еуропа чемпиондары кубогының (қазіргі УЕФА Чемпиондар лигасы) алғашқы матчында кипрлік «АЕЛ Лимасолды» 6:0 есебімен ойсырата жеңді. Голдарды Пирри (10, 14, 63-минуттар – хет-трик), Амансио (17), Перес (27) және Буэно (75) соқты.

Әлемдік бокстың классикалық жекпе-жегі

1976 – осы күні пуэрторикалық танымал боксшы Альфредо Эскалера америкалық Рэй Ланниді жеңіп, WBC нұсқасы бойынша екінші жеңіл салмақтағы чемпиондық белбеуін кезекті рет қорғады. 15 раундқа жоспарланған жекпе-жек 12-раундта аяқталды: Ланнидің командасы боксшыны рингке шығарудан бас тартты.

Жалпы Эскалера WBC белбеуін он рет сәтті қорғады. Алайда 1978 жылдың қаңтарында ол никарагуалық Алексис Аргуэльомен жекпе-жекте WBC титулынан айырылды. Бұл айқас қос боксшы да көп жарақат алғандықтан, бокс тарихына «Баямондағы қанды шайқас» деген атаумен енді. Төреші 13-раундта Эскалераның қанап тұрған жарақатына байланысты жекпе-жекті тоқтатты. Осылайша жеңіс пен екінші жеңіл салмақтағы WBC титулы Аргуэльоға бұйырды.

Наим Сүлейманоғлының тарихи жетістігі

1989 – осы күні түрік ауыр атлеті Наим Сүлейманоғлы (60 кг) Афиныда өткен әлем чемпионатында алтын медаль жеңіп алды. Екі сайыс қорытындысында ол 317 келі көтерді. Бұл оның әлем чемпионаттарындағы үшінші алтын медалі еді.

Бернард Хопкинстің аңызға айналған нокауты

2004 – осы күні атақты америкалық боксшы Бернард Хопкинс орта салмақтағы абсолютті әлем чемпионы атанды. Лас-Вегаста өткен турнирде ол тағы бір жұлдызды америкалық боксшы Оскар Де Ла Хойяны нокаутқа түсірді. Хопкинстің бауырға жасаған ауыр соққысынан кейін Де Ла Хойя рингке құлап, шамамен бір минут бойы орнынан тұра алмады. Нәтижесінде төреші нокаутты тіркеді.

Мессидің хет-тригі «Барселонаға» «Камп Ноуда» жеңіс әкелді

2013 – осы күні «Барселона» Чемпиондар лигасының топтық кезеңіндегі алғашқы матчында «Аяксты» 4:0 есебімен ойсырата жеңді. Кездесудің басты жұлдызы Лионель Месси болды. Ол матчтың 75-минутында «Барселона» сапындағы 24-ші хет-тригін жасады. Команданың тағы бір голын Жерар Пике (69) соқты. Сонымен қатар бұл матч «Барса» командасының жаңа бас бапкері Херардо Мартиноның Чемпиондар лигасының негізгі кезеңіндегі сәтті дебюті болды.

Осы күні дүниеге келгендер:

1971 – Лэнс Армстронг, америкалық тасжол велошабандозы, «Тур де Франс» жарысының жеті дүркін жеңімпазы. 2012 жылы жүйелі түрде допинг қолданғаны үшін өмір бойына спорттан шеттетіліп, 1998 жылдан бері жеңіп алған барлық спорттық атақтарынан айырылды.

1976 – Роналду Луис Назариу ди Лима (Роналдо), бразилиялық шабуылшы. Оның жетістіктері қатарында әлем чемпионаттарының екі алтын медалі (АҚШ-1994, Корея/Жапония-2002), екі «Алтын доп» (1997, 2002), бір «Алтын бутсы» (1997) және ФИФА нұсқасы бойынша жылдың үздік футболшысы атағын үш рет (1996, 1997, 2002) жеңіп алу бар.