Шаварш Карапетянның ерлігі және «МЮ» мен «Барселонаның» голды бәсекесі: спорт тарихындағы бұл күн

Қазақстан:

Головкин – Альварес трилогиясының басталуы

2017 жыл – осы күні Лас-Вегастағы «T-Mobile Arena» спорт сарайында қазақстандық боксшы Геннадий Головкин мен мексикалық Сауль Альварес арасындағы аты аңызға айналған трилогияның алғашқы жекпе-жегі өтті.

Головкин орта салмақта WBA (Super), WBC, IBF және IBO нұсқалары бойынша чемпиондық белбеулерін қорғауы тиіс болса, Альварес беделді The Ring журналының белбеуін ортаға салды.

12 раундқа созылған жекпе-жек тең аяқталды. Төрешілердің есептері – 110:118, 115:113 және 114:114.

Жұлдызды боксшылар арасындағы қарымта жекпе-жек 2018 жылдың қыркүйегінде өтті. Бұл жолы төрешілердің бөлінген шешімімен Сауль Альварес жеңіске жетті.

Әлем:

Шаварш Карапетянның ерлігі

1976 жыл – осы күні Арменияда, Ереванның оңтүстік-батыс бөлігінде алапат қайғылы оқиға болды. Ереван су қоймасына ішінде жолаушылары бар троллейбус құлап кетті.

Оқиғаның куәгерлері 23 жастағы жүзуші Шаварш Карапетян мен оның ағасы Камо болды. Олар суасты жүзуінен КСРО құрамасының мүшелері еді. Қайғылы жағдай болған күні ағайынды Карапетяндар су қоймасы маңындағы жолда таңғы жүгірумен айналысып жүрген.

Шаварш бірден суға секіріп, 10 метр тереңдікте троллейбустың артқы әйнегін сындырып, жолаушыларды құтқара бастады. Ол есінен танып қалған 92 адамның 46-сын судан алып шықты. Құтқарылған жолаушыларды Карапетян ағасына беріп отырған. Зардап шеккендер бірден ауруханаға жеткізіліп, дәрігерлер олардың 20-сының өмірін сақтап қалды.

Суға кезекті рет сүңгігенде Карапетян адамды емес, троллейбус орындығының жастығын алып шыққанын түсінеді. Кейін бұл жастық оның түсіне жиі кірген. Себебі ол тағы бір адамның өмірін сақтап қалуы мүмкін еді.

Суық суға қайта-қайта сүңгу денсаулығына ауыр әсер етті. Қайғылы оқиғадан кейін Карапетян сепсиспен асқынған ауыр пневмонияға шалдықты.

Кәсіби спортшы ретінде Шаварш Карапетян да зор жетістіктерге жетті. Ол 11 әлемдік рекорд орнатып, 13 рет Еуропа чемпионы атанды және КСРО-ның еңбек сіңірген спорт шебері атағын алды.

Әлемдік бокс классикасы

1981 жыл – осы күні бокс тарихындағы ең атақты спортшылардың бірі Шугар Рэй Леонард Лас-Вегаста өткен турнирде америкалық Томас Хирнсті 14-раундта техникалық нокаутпен жеңді.

Бұл 1980 жылдардағы жартылай орта салмақтағы ең көп күтілген жекпе-жектердің бірі болды. Осы жеңістің арқасында Леонард абсолютті әлем чемпионы атанды.

Айта кетейік, Шугар Рэй Леонард, Томас Хирнс, Марвин Хаглер және Роберто Дюран 1980 жылдары үстемдік құрған америкалық және латынамерикалық үздік боксшылардан құралған әйгілі «Бокс патшалары» төрттігіне кіреді.

«Олд Траффордтағы» тартыс

1998 жыл – осы күні «Манчестер Юнайтед» Чемпиондар лигасы топтық кезеңінің бірінші турында «Барселонамен» 3:3 есебімен тең түсті. Ойын «Олд Траффорд» стадионында өтті.

Голдарды Райан Гиггз (16-минут), Пол Скоулз (24), Сонни Андерсон (47), Джованни (59), Дэвид Бекхэм (63) және Луис Энрике (70) соқты.

Бұл матч Дэвид Бекхэмнің айып добынан соққан әдемі голымен, Хави Эрнандестің Чемпиондар лигасындағы дебютімен және «МЮ» жартылай қорғаушысы Никки Батттың қақпаны қолмен қорғағаны үшін алаңнан қуылуымен есте қалды.

Ferrari пилоттары Бельгияда дубль жасады

2007 жыл – осы күні Ferrari командасының финляндиялық пилоты Кими Райкконен Бельгия Гран-приінде жеңіске жетті.

Екінші орынға Райкконеннің командаласы, бразилиялық автокөлік жүргізушісі Фелипе Масса ие болды. Үздік үштікті McLaren-Mercedes сапындағы испаниялық Фернандо Алонсо түйіндеді.

Жарыс Спа-Франкоршам автодромында өтті. 2007 жылғы маусымда Райкконен 110 ұпай жинап, Формула-1 чемпионы атанды.

Бұл күні дүниеге келгендер:

1956 жыл – Анатолий Белоглазов, кеңестік еркін күрес шебері. Олимпиада ойындарының (Мәскеу-1980) чемпионы, әлемнің үш дүркін чемпионы.

1973 жыл – Александр Винокуров, аты аңызға айналған қазақстандық велошабандоз. Олимпиада ойындарының чемпионы (Лондон-2012) және күміс жүлдегері (Сидней-2000). 2006 жылғы «Вуэльта Испания» жеңімпазы.

1983 жыл – Кирсти Ковентри, жүзуші. Олимпиада ойындарында (Афины-2004, Бейжің-2008) екі алтын, төрт күміс және бір қола медаль жеңіп алған.