Қазақстандық боксшылардың әлем чемпионатындағы медальды шеруі және Холандтың жойқын голы: спорт тарихында бұл күн

Қазақстан:

Қазақстандық боксшылардың Ливерпульдегі әлем чемпионатындағы триумфы

2025 – осы күні Қазақстанның бокс құрамасы Ливерпульде өткен әлем чемпионатындағы өнерін аяқтап, жалпыкомандалық медальдық есепте бірінші орын алды. Қазақстандық былғары қолғап шеберлері 10 медаль – 7 алтын, 1 күміс және 2 қола жүлде жеңіп алды.

Алтын медаль саны бойынша Қазақстан құрамасы басты қарсыластары Өзбекстаннан басым түсті. Өзбекстандық боксшылардың еншісінде 6 алтын, 2 күміс және 3 қола медаль болды. Үздік үштікті 2 алтын, 1 күміс және 1 қола жүлде алған Үндістан құрамасы түйіндеді.

Қазақстандық боксшылар арасынан әлем чемпионы атанғандар: Алуа Балқыбекова (51 кг), Санжар Тәшкенбай (50 кг), Махмұд Сабырхан (55 кг), Аида Әбікеева (65 кг), Наталья Богданова (70 кг), Төрехан Сабырхан (70 кг) және Айбек Оралбай (90 кг-нан жоғары).

Назым Қызайбай күміс медаль жеңіп алса, Виктория Графеева (60 кг) мен Елдана Талипова (80 кг-нан жоғары) әлем чемпионатының қола жүлдегері атанды.

Әлем:

Автоспорт тарихынан

2008 – осы күні атақты германиялық автокөлік жарысының шебері Себастьян Феттель Италия Гран-приінде жеңіске жетіп, Формула-1 тарихындағы ең жас Гран-при жеңімпазы атанды. Ол кезде Феттель 21 жаста, 2 ай және 11 күнде еді. Кейін оның жас бойынша рекордын Кими Антонелли (19 жас, 202 күн) және Макс Ферстаппен (18 жас, 228 күн) жаңартты.

Сауль Альварестің мансабындағы алғашқы жеңілісі

2013 – осы күні америкалық боксшы Флойд Мейвезер төрешілердің көпшілік шешімімен мексикалық Сауль Альваресті жеңіп, WBC және WBA нұсқалары бойынша бірінші орта салмақтағы абсолютті әлем чемпионы атанды.

36 жастағы Мейвезер сол кезде 23 жаста болған Альварестің жеңілмеген деген атағын жоққа шығарды. Ол кезде мексикалық боксшы кәсіпқой рингте 42 жеңіске жетіп, бірде-бір рет жеңілмеген еді. Лас-Вегаста өткен жекпе-жек 12 раундқа созылып, жанкүйерлерге тартысты айқас сыйлады.

Эрлинг Холандтың әдемі соққысы «Манчестер Ситиге» жеңіс әкелді

2022 – осы күні «Манчестер Сити» Чемпиондар лигасы топтық кезеңінің екінші турында дортмундтық «Боруссияны» 2:1 есебімен жеңді.

«Боруссия Дортмунд» жартылай қорғаушысы Джуд Беллингем 56-минутта есеп ашты. Кейін қорғаушы Джон Стоунз таразы басын теңестірді. Ал «қалалықтарға» жеңіс голын Эрлинг Холанд соқты. Норвегиялық шабуылшы акробатикалық секірісте әдемі соққы жасап, допты қақпаға бағыттады.

Маусым аяқталғаннан кейін Холандтың бұл голы 2022/23 жылғы Чемпиондар лигасындағы ең үздік гол деп танылды.

Лас-Вегастағы чемпиондық белбеулер үшін айқастар

2024 – осы күні UFC 306 турнирінде екі титулдық жекпе-жек өтті:

– Грузиялық аралас жекпе-жек шебері Мераб Двалишвили америкалық Шон О’Мэллиді жеңіп, UFC-тің жеңіл салмақтағы чемпионы атанды. Бес раундқа созылған жекпе-жекте Двалишвили төрешілердің бірауызды шешімімен жеңіске жетті – 49:46, 48:47, 48:47. Двалишвили мен О’Мэлли арасындағы реванш 2025 жылғы маусымда өтті. Грузиялық файтер бұл жолы да чемпиондық белбеуін қорғап, америкалық қарсыласын үшінші раундта тұншықтыру әдісімен жеңді.

– Қырғызстан өкілі Валентина Шевченко төрешілердің бірауызды шешімімен (50:45, 50:45, 50:45) мексикалық Алекса Грассоны жеңіп, UFC-тің ең жеңіл салмақтағы чемпиондық белбеуін қайтарып алды.

Бұл күні дүниеге келгендер:

1989 – Джимми Батлер, НБА-ның «Голден Стэйт Уорриорз» командасында өнер көрсететін америкалық баскетболшы. НБА жұлдыздар матчына алты рет қатысқан, 2016 жылғы Рио-де-Жанейро Олимпиадасының чемпионы.

1993 – Назым Қызайбай, Қазақстан құрамасының боксшысы. 2024 жылғы Париж Олимпиадасының қола жүлдегері, әлем чемпионаттарының үш дүркін алтын, күміс және қола жүлдегері.

2000 – Надежда Рябец, Қазақстанның бокс құрамасының өкілі. 2023 жылы Нью-Делиде өткен әлем чемпионатының қола жүлдегері.