Хабиб Нурмагомедовтың жекпе-жегінен кейінгі төбелес және Геннадий Головкиннің жарқын жеңісі: әлем тарихындағы бұл күн

Қазақстан:

Батыр Жүкембаевтың нокауты

2018 жыл – осы күні қазақстандық боксшы Батыр Жүкембаев Канаданың Квебек қаласында өткен турнирде мексикалық Патрисио Мореноны жетінші раундта нокаутқа түсірді. Жекпе-жек бірінші жартылай орта салмақта өтті.

Геннадий Головкиннің тарихи жеңісі

2019 жыл – 5 қазаннан 6 қазанға қараған түні қазақстандық боксшы Геннадий Головкин украиналық Сергей Деревянченконы төрешілердің бірауызды шешімімен жеңді. Жекпе-жекте орта салмақтағы IBF және IBO нұсқалары бойынша бос тұрған әлем чемпионы белбеулері сарапқа салынды. GGG мансабындағы 40-жеңісіне жетіп, екі чемпиондық белбеуін қайтарып алды.

Жекпе-жек Нью-Йорктегі «Мэдисон-сквер-гарден» аренасында өтті. Головкин – Деревянченко жекпе-жегінің андеркартында тағы бір қазақстандық боксшы Әли Ахмедов өнер көрсетті. Ол америкалық Эндрю Эрнандесті бірінші раундта техникалық нокаутпен жеңіп, екінші орта салмақтағы WBC International Silver белбеуін қорғады.

Әлем:

6 қазан – автоспорт тарихындағы атаулы күн. Осы күні:

1973 жыл – француз автошабандозы Франсуа Север қайғылы қаза тапты. АҚШ Гран-приінің «Уоткинс-Глен» тасжолындағы іріктеу кезеңінде оның көлігі металл қоршауға соғылып, аударылып кетті. Франсуа Север ауыр жарақат алып, оқиға орнында көз жұмды. Осы қайғылы жағдайдан кейін оның Tyrrell командасы жарыстан бас тартты.

1974 жыл – аргентиналық автошабандоз Карлос Ройтеман (Brabham-Ford) АҚШ Гран-приінде жеңіске жетті. Екінші болып бразилиялық Карлус Пасе (Brabham-Ford) мәреге жетсе, үшінші орынға америкалық Джеймс Хант (Hesketh-Ford) ие болды. Осы Гран-при барысында бразилиялық Эмерсон Фиттипальди 1974 жылғы Формула-1 маусымындағы чемпиондық атағын мерзімінен бұрын қамтамасыз етті.

1985 жыл – британдық Найджел Мэнселл (Williams-Honda) Еуропа Гран-приінде жеңіске жетті. Екінші орынды бразилиялық Айртон Сенна (Lotus-Renault) иеленсе, үшінші болып финляндиялық Кеке Росберг (Williams-Honda) келді. Дәл осы Гран-при барысында француз Формула-1 аңыздарының бірі Ален Прост маусым аяқталмай тұрып әлем чемпионы атанды.

Уэйн Гретцкидің «Лос-Анджелес Кингз» сапындағы алғашқы ойыны

1988 жыл – осы күні аты аңызға айналған канадалық хоккейші Уэйн Гретцки «Лос-Анджелес Кингз» сапында алғашқы матчын өткізді. «Детройт Ред Уингзге» қарсы кездесуде Гретцки алғашқы соққысынан-ақ шайба соғып, үш нәтижелі пас берді. «Лос-Анджелес Кингз» қарсыласын 8:2 есебімен ойсырата жеңді. Инглвудтағы (Калифорния штаты) «Форум» аренасында өткен кездесуді 16 мың көрермен тамашалады.

Майкл Джордан НБА-дан кетті

1993 жыл – осы күні америкалық танымал баскетболшы Майкл Джордан алғаш рет НБА-дан кететінін мәлімдеді. Атақты спортшыны құмар ойындарға тәуелді деп айыптаған журналистердің қысымына ұшырап, әкесінің қазасын ауыр қабылдады. НБА-ның алты дүркін чемпионы кәсіби спорттағы мансабын 1993, 1998 және 2003 жылдары үш рет аяқтайтынын жариялады.

Хабиб Нурмагомедовтың жарқын жеңісі

2018 жыл – осы күні ресейлік ММА файтері Хабиб Нурмагомедов ирландиялық Конор Макгрегорды төртінші раундта тұншықтыру әдісімен жеңіп, UFC-дің жеңіл салмақтағы чемпиондық белбеуін қорғады. Олардың жекпе-жегі Лас-Вегаста өткен UFC 229 турнирінің басты оқиғасы болды.

Жекпе-жек аяқталғаннан кейін октагонда жаппай төбелес басталды. Нурмагомедов октагоннан асып түсіп, Макгрегордың джиу-джитсудан жаттықтырушысы Диллон Дэниске шабуыл жасаған деген болжам айтылды. Осыдан кейін жаппай төбелеске ұласты. UFC тарихында алғаш рет ринг-анонсер Брюс Баффер жеңімпазды оның қатысуынсыз жариялауға мәжбүр болды.

6 қазанда әлемде болған тарихи оқиғалар

1927 жыл — Нью-Йоркте алғашқы дыбысты фильм «Джаз әншісі» («The Jazz Singer») фильмінің премьерасы өтті.

1948 жыл – 6 қазанға қараған түні Ашхабадта Рихтер шкаласы бойынша магнитудасы 9 балл болған жер сілкінісі болды.

Осы күні туғандар

1947 жыл – Клаус Дибиаси, италиялық суға секіруші, үш дүркін Олимпиада чемпионы. XX ғасырдағы ең үздік суға секірушілердің бірі.

1964 жыл – Томас Джегер, америкалық жүзуші, бес дүркін Олимпиада чемпионы, төрт дүркін әлем чемпионы.