Кот-д’Ивуар футболшысына Канада аумағына кіруге рұқсат берілмеді
Фото: ФИФА
Кот-д’Ивуар ұлттық құрамасының шабуылшысы Элье Ваи 2026 жылғы футболдан әлем чемпионатының топтық кезеңінің 2-турындағы Германияға қарсы матчқа командасымен бірге бара алмады.
Бұған оның Канада аумағына кіруге қажетті рұқсаттарының болмауы себеп болған, деп хабарлайды Кот-д’Ивуар футбол федерациясының ресми мәлімдемесі.
Мәлімдемеде 17 маусымдағы жағдай бойынша федерация Ваиға қатысты қандай да бір құқықтық немесе әкімшілік тергеулер жөнінде ресми хабарлама алмағаны айтылған. Ойыншы ұйымның толық қолдауына ие және ұлттық құраманың маңызды бөлігі болып қала береді. Делегация Канададан оралғанға дейін футболшы АҚШ аумағында болады.
Кот-д’Ивуар құрамасы Е тобында өнер көрсетеді. Олар Эквадорды 1:0 есебімен жеңіп, қазір екінші орында тұр. Команда келесі матчын 20 маусымда Германияға қарсы Торонто қаласында өткізеді.
