«Лужникидегі» қайғылы оқиға, Дик Фосберидің рекорды және Андерсон Силваның жеңісі: 20 қазан тарихта

Автоспорт тарихындағы күн

1991 жыл – австриялық Герхард Бергер «Макларен-Хонда» командасымен Жапония Гран-приінде жеңіске жетті. Екінші орынды оның командаласы, бразилиялық Айртон Сенна иеленсе, үшінші болып италиялық Риккардо Патрезе мәреге жетті. Осы жарыстан кейін Сенна Формула-1 чемпионы атануын мерзімінен бұрын қамтамасыз етті. Жарыс Жапониядағы «Сузука» автодромында өтті. Бұл Айртон Сенна, Ален Прост, Нельсон Пике және Найджел Мэнселлдің барлығы бір жарысқа қатысқан Формула-1 тарихындағы соңғы кезең болды.

2024 жыл – Ferrari командасының пилоты Шарль Леклер АҚШ Гран-приінде жеңіске жетті. Екінші орынды оның командаласы Карлос Сайнс, ал үшінші орынды Red Bull өкілі Макс Ферстаппен иеленді. Жарыс АҚШ-тағы «Америка трассасы» автодромында өтті.

Олимпиада рекордтарының парақтары

1968 жыл – америкалық биіктікке секіруші Дик Фосбери Мехикода өткен Олимпиада ойындарында алтын медаль жеңіп алды. Ол 2 метр 24 сантиметр нәтижесімен Олимпиада рекордын орнатты. Спортшы биіктікке секірудің жаңа тәсілін қолданысқа енгізді. Бұл әдісте спортшы планкадан арқасымен өтеді. Кейін ол «Фосбери-флоп» деген атаумен танылды.

Марадона дәуірінің бастауы

1976 жыл – 15 жастағы Диего Марадона Аргентина чемпионатында «Архентинос Хуниорс» клубының негізгі құрамында алғашқы ойынын өткізді. Оның командасы «Тальереске» 0:1 есебімен жол берді. Бұл кездесу ХХ ғасырдағы ең үздік футболшылардың бірі саналатын Марадонаның кәсіби мансабындағы маңызды кезең болды.

«Лужникидегі» қайғылы оқиға

1982 жыл – Мәскеудегі Ленин атындағы Орталық стадионда, қазіргі «Лужники» аренасында, УЕФА кубогының 1/16 финалы аясында «Спартак» пен нидерландтық «Харлем» кездесті. Мәскеулік клуб 2:0 есебімен жеңіске жетті.

Матчты С және А трибуналарынан 16 мың көрермен тамашалады. Кездесу аязды әрі қарлы күні өтті. Ауа райының қолайсыздығына байланысты полиция С трибунасынан шығатын бір ғана тар есікті ашқан.

Ойынның аяқталуына бірнеше минут қалғанда жанкүйерлер метроға ертерек жету үшін стадионнан шыға бастаған. Алайда матчтың соңғы секундтарында «Спартак» футболшысы Сергей Швецов екінші голды соқты. Осыдан кейін сыртқа шығып кеткен көрермендердің бір бөлігі қайтадан стадионға қарай ұмтылған.

Мұз басқан баспалдақта адамдар бір-бірін таптап, жаппай кептеліс пайда болды. Қайғылы оқиға салдарынан 66 адам қаза тапты. Бұл кеңестік және әлемдік футбол тарихындағы ең ауыр трагедиялардың бірі болып саналады.

Андерсон Силваның жеңісі

2007 жыл – ММА тарихындағы ең атақты спортшылардың бірі Андерсон Силва UFC 77 турнирінде америкалық Рич Франклинмен қарымта жекпе-жек өткізді. Цинциннатиде өткен кездесуде бразилиялық файтер екінші раундта техникалық нокаутпен жеңіске жетіп, орта салмақтағы чемпиондық белбеуін қорғап қалды.

Әлем тарихындағы 20 қазан

- 1911 жыл – Руаль Амундсен бастаған экспедиция Оңтүстік полюске қарай жолға шықты.

- 1964 жыл – британдық The Rolling Stones рок-тобы Парижде алғашқы концертін берді. Тәртіпсіздіктерден кейін 150 адам тұтқындалды.

- 1968 жыл – АҚШ-тың бұрынғы бірінші ханымы Жаклин Кеннеди грек миллиардері Аристотель Онассиске тұрмысқа шықты.

- 1993 жыл – Лондон хайуанаттар бағында Джеймс Бонд пен Индиана Джонс туралы фильмдерге түскен Белинда есімді өрмекші өлді.

20 қазанда дүниеге келгендер

- 1962 жыл – Анатолий Храпатый, кеңестік және қазақстандық ауыр атлет. Сеул-1988 Олимпиадасының күміс, Атланта-1996 Олимпиадасының күміс жүлдегері. 2008 жылы тамызда жол апатынан қаза тапты.

- 1997 жыл – Андрей Рублев, ресейлік теннисші. Токио-2020 Олимпиадасының аралас жұптағы чемпионы, 22 ATP турнирінің жеңімпазы. Оның 18 жеңісі жекелей сында тіркелген. 2021 жылы Ресей құрамасымен Дэвис кубогын жеңіп алды.