Мұхаммед Әлидің рингке оралуы және Майкл Джорданның НБА-дағы дебюті: 26 қазандағы тарихи оқиғалар

Қазақстан

2013 жыл – Алматыдағы Балуан Шолақ атындағы спорт сарайында бокстан әлем чемпионаты аяқталды. Қазақстандық боксшылар сегіз медаль жеңіп алды.

Алтын: Біржан Жақыпов (49 келі), Мерей Ақшалов (64 келі), Данияр Елеусінов (69 келі) және Жәнібек Әлімханұлы (75 келі).

Күміс: Әділбек Ниязымбетов (81 келі) және Иван Дычко (91 келіден жоғары).

Қола: Қайрат Ералиев (56 келі) және Берік Әбдірахманов (60 келі).

Әлем спорты

26 қазан – автоспорт тарихындағы маңызды күндердің бірі.

1986 жыл – француз автокөлік жарысының аңызы Ален Прост (McLaren–TAG) Австралия Гран-приінде жеңіске жетті. Екінші орынды бразилиялық Нельсон Пике (Williams–Honda), үшінші орынды швециялық Стефан Юханссон (Ferrari) иеленді. Жарыс Аделаида қаласында өтті.

1997 жыл – финляндиялық Мика Хаккинен (McLaren–Mercedes) Еуропа Гран-приінде жеңіске жетті. Екінші орынға британиялық Дэвид Култхард (McLaren–Mercedes), үшінші орынға канадалық Жак Вильнев (Williams–Renault) тұрақтады. Испанияның Херес-де-ла-Фронтера қаласындағы жарыс Вильнев пен Михаэль Шумахер арасындағы әлем чемпионы атағы үшін күрес кезінде болған даулы апатпен есте қалды.

2025 жыл – британиялық Ландо Норрис (McLaren) Мексика Гран-приінде мәреге бірінші болып жетті. Ferrari командасының өкілі Шарль Леклер екінші, Red Bull сапындағы нидерландтық Макс Ферстаппен үшінші орын алды. Жарыс ағайынды Родригестер атындағы автодромда өтті.

Владимир Бакулиннің Олимпиададағы жүлдесі

1968 жыл – қазақстандық грек-рим күресінің шебері Владимир Бакулин Мехикода өткен XIX жазғы Олимпиада ойындарында күміс медаль жеңіп алды. Ол алтын жүлде үшін күресте болгариялық Петър Кировқа ұпай санымен жол берді. Бұл Қазақстанның күрес мектебі тарихындағы алғашқы Олимпиада медалі еді.

«Ұлының» көптен күткен оралуы

1970 жыл – аты аңызға айналған ауыр салмақтағы боксшы Мұхаммед Әли үш жылдан астам үзілістен кейін рингке қайта оралды. Ол отандасы Джерри Куорриді үшінші раундта техникалық нокаутпен жеңді. Қарсыласының жарақатына байланысты жекпе-жек тоқтатылды.

Мұхаммед Әли Вьетнам соғысына қатысудан ашық бас тартқаны үшін ұзақ уақыт бойы бокс лицензиясынан айырылып, жекпе-жектерге қатыса алмады.

Майкл Джордан және баскетбол жұлдыздарының НБА-дағы дебюті

1984 жыл – аты аңызға айналған баскетболшылар Майкл Джордан, Чарльз Баркли және Джон Стоктон НБА-дағы алғашқы ойындарын өткізді.

Майкл Джордан «Чикаго Буллз» сапында «Вашингтон Буллетс» командасына қарсы ойнап, 109:93 есебімен жеңіске жетті.

Чарльз Баркли «Филадельфия Севенти Сиксерс» құрамында «Кливленд Кавальерс» командасына қарсы дебют жасап, 111:101 есебімен жеңіске жетті.

Джон Стоктон «Юта Джаз» сапында алғашқы ойынын өткізіп, командасымен бірге «Сиэтл Суперсоникске» 94:102 есебімен есе жіберді.

Серена Уильямс WTA қорытынды турнирінде бесінші рет топ жарды

2014 жыл – америкалық теннисші Серена Уильямс Сингапурда өткен WTA қорытынды турнирінің жеңімпазы атанды. Финалда ол румыниялық Симона Халепті 6:3, 6:0 есебімен ойсырата жеңді.

Бұл Серена Уильямстың аталған турнирдегі бесінші жеңісі болды. Бұған дейін ол 2001, 2009, 2012 және 2013 жылдары чемпион атанған еді.

26 қазандағы әлем тарихындағы өзге оқиғалар

1861 жыл – неміс өнертапқышы Филипп Рейс Франкфуртте өзі «телефон» деп атаған құрылғысын таныстырды.

1962 жыл – британдық The Beatles тобы «Please, Please Me» және «Ask Me Why» әндерін жазды.

1984 жыл – режиссер Джеймс Кэмеронның «Терминатор» фантастикалық боевигінің премьерасы өтті. Бұл кейін танымал франшизаға айналған алғашқы фильм еді.

2015 жыл – Ауғанстан мен Пәкістан аумағында эпицентрі орналасқан, магнитудасы 7,5-ке жеткен жойқын Гиндукуш жер сілкінісі болды. Жерасты дүмпулері Қытай, Ресей, Қазақстан, Өзбекстан, Тәжікстан және Қырғызстан аумақтарында да сезілді.

Бұл күні дүниеге келгендер

1971 жыл – Одли Харрисон, британдық кәсіпқой боксшы, 2000 жылы Сиднейде өткен Олимпиада чемпионы.

1982 жыл – Никола Адамс, британдық боксшы, 2012 жылғы Лондон және 2016 жылғы Рио-де-Жанейро Олимпиадасының екі дүркін чемпионы.