Шавкат Рахмоновтың UFC-дегі дебюті және Хабиб Нұрмағамедовтің соңғы жекпе-жегі: әлем тарихындағы бұл күн

Қазақстан

Шавкат Рахмоновтың UFC-дегі алғашқы жеңісі

2020 жыл – дәл осы күні қазақстандық ММА файтері Шавкат Рахмонов Абу-Дабидегі (БАӘ) Жауынгерлер аралында өткен UFC 254 турнирінде бразилиялық Алекс Оливейраны бірінші раундта тұншықтыру әдісімен жеңді. Жекпе-жек жартылай орта салмақта өтті. Бұл Рахмоновтың америкалық промоушендегі алғашқы кездесуі еді.

Әлем

Автоспорттағы айтулы жеңістер

1976 жыл – америкалық Марио Андретти «Фудзи Спидвей» автодромында өткен Жапония Гран-приінде жеңіске жетті. Lotus-Ford командасының өкілі мәреге бірінші болып келді. Екінші орынды француз Патрик Депайе (Tyrrell-Ford), үшінші орынды британдық Джеймс Хант (McLaren-Ford) иеленді. Осы Гран-при қорытындысы бойынша Джеймс Хант мерзімінен бұрын Формула-1 чемпионы атанды.

1993 жыл – Формула-1-дің үш дүркін чемпионы, бразилиялық Айртон Сенна (McLaren-Ford) «Сузука» автодромында өткен Жапония Гран-приінде топ жарды. Екінші болып француз Ален Прост (Williams-Renault) мәреге жетсе, үшінші орынды финляндиялық Мика Хаккинен (McLaren-Ford) иеленді.

2010 жыл – испаниялық Фернандо Алонсо (Ferrari) Формула-1 тарихындағы Оңтүстік Корея Гран-приінің алғашқы жеңімпазы атанды. Екінші орынды британдық Льюис Хэмилтон (McLaren-Mercedes), үшінші орынды бразилиялық Фелипе Масса (Ferrari) иеленді. Жарыс Оңтүстік Кореяның Чолла-Намдо провинциясындағы халықаралық автодромда өтті.

2021 жыл – нидерландылық Макс Ферстаппен (Red Bull) АҚШ Гран-приінде жеңіске жетті. Екінші орынға британдық Льюис Хэмилтон (Mercedes), үшінші орынға мексикалық Серхио Перес (Red Bull) жайғасты. Жарыс АҚШ-тағы «Америка трассасы» автодромында өтті.

Токиодағы Олимпиада ойындарының аяқталуы

1964 жыл – дәл осы күні Токиода XVIII жазғы Олимпиада ойындары аяқталды. Бұл Азия құрлығында алғаш рет ұйымдастырылған Олимпиада болды. Медальдар кестесінің үздік үштігіне мына құрамалар енді:

1. АҚШ – 36 алтын, 26 күміс, 28 қола медаль.

2. КСРО – 30 алтын, 31 күміс, 35 қола медаль.

3. Жапония – 16 алтын, 5 күміс, 8 қола медаль.

Дебби Мейердің Олимпиададағы триумфы

1968 жыл – америкалық жүзуші Дебби Мейер Мехикода өткен Олимпиада ойындарында алтын медаль жеңіп алды. Ол 800 метрге еркін стильде жүзуде 9:24.0 нәтижесімен әлемдік рекорд орнатты. Мейер Мехикодағы Олимпиадада жалпы үш алтын медаль иеленді. 1977 жылы ол Дүниежүзілік жүзу даңқ залына енгізілді.

Билл Роджерстің жарқын жеңісі

1976 жыл – әйгілі америкалық марафоншы Билл Роджерс Нью-Йорк марафонында жеңімпаз атанды. Ол қашықтықты 2 сағат 10 минут 10 секундта жүгіріп өтті. Әйелдер арасындағы жарыста америкалық Мики Горман 2:39:11 нәтижесімен топ жарды. Марафон Нью-Йорктің бес ауданын қамтыды.

Хабиб Нұрмағамедовтің мансабын аяқтауы

2020 жыл – ресейлік ММА файтері Хабиб Нұрмағамедов Абу-Дабиде өткен UFC 254 турнирінің басты жекпе-жегінде америкалық Джастин Гэтжиді екінші раундта тұншықтыру әдісімен жеңді. Осылайша ол UFC-дің жеңіл салмақтағы чемпионы атағын қорғап, мансабын аяқтайтынын жариялады.

Әкесі әрі бапкері Абдулманап Нұрмағамедов қайтыс болғаннан кейін Хабиб аралас жекпе-жектен кетуге шешім қабылдады. Ол кәсіби мансабын жеңіліссіз аяқтады: 29 жеңіс, бірде-бір жеңіліс жоқ.

«Олд Траффордтағы» ойсырата жеңіліс

2021 жыл – Англия чемпионатының тоғызыншы турында «Ливерпуль» сырт алаңда «Манчестер Юнайтедті» 5:0 есебімен тас-талқан етті.

Голдарды Наби Кейта (5-минут), Диогу Жота (13-минут) және Мохамед Салах (38, 45+5, 50-минуттар) соқты. Салах хет-трик авторы атанды. Бұл «Манчестер Юнайтедтің» «Ливерпульден» өз алаңында қабылдаған ең ірі жеңілістерінің бірі болды.

24 қазанда әлемде аталып өтетін күндер

- Біріккен Ұлттар Ұйымының күні.

- Дүниежүзілік полиомиелитке қарсы күрес күні.

1901 жыл – америкалық Энни Тейлор ағаш бөшкенің ішіне отырып, Ниагара сарқырамасынан өтті.

1960 жыл – «Байқоңыр» ғарыш айлағында құрлықаралық зымыранның жарылуы салдарынан 78 адам қаза тапты.

1986 жыл – Лондонда әлемдегі ең ірі грампластинка дүкені ашылды.

Бұл күні дүниеге келгендер

1985 жыл – Уэйн Руни, Англия құрамасы мен «Манчестер Юнайтедтің» аңызына айналған футболшы. Англия Премьер-лигасының тарихындағы үздік сұрмергендер тізімінде 208 голмен үшінші орында тұр. УЕФА Чемпиондар лигасының жеңімпазы, Англия Суперкубогының бірнеше дүркін иегері.

1988 жыл – Александр Волков, ресейлік UFC файтері. Ауыр салмақта Bellator және M-1 Challenge ұйымдарының бұрынғы чемпионы.