Жаңыл Балтабаеваның Азия Пара ойындарындағы қола жүлдесі және Федор Емельяненконың жарқын нокауты: бұл күнгі тарихи оқиғалар

Қазақстан

Жаңыл Балтабаеваның қола жүлдесі

2023 жыл – осы күні қазақстандық Жаңыл Балтабаева Ханчжоуда өткен Азия Пара ойындарының қола жүлдегері атанды. Ол параканоэден VL3 санатында 200 метр қашықтыққа жарысуда үшінші орын алды.

Әлем спорты

23 қазан – автоспорт тарихындағы маңызды күндердің бірі.

1977 жыл – британиялық Джоди Шектер «Макларен» командасымен «Фудзи Спидвей» автодромында өткен Жапония Гран-приінде жеңіске жетті. Екінші орынды аргентиналық Карлос Ройтеман («Феррари»), ал үшінші орынды франциялық Патрик Депайе («Тиррелл») иеленді. Қауіпсіздік мәселелері мен тасымалдау шығындарының қымбаттығына байланысты келесі Жапония Гран-приі өткізілмеді. Жарыс араға он жыл салып, «Сузука» трассасында қайта ұйымдастырылды.

2016 жыл – «Формула-1»-дің жеті дүркін чемпионы Льюис Хэмилтон («Мерседес») АҚШ Гран-приінде топ жарды. Екінші орынды германиялық Нико Росберг («Мерседес»), үшінші орынды австралиялық Даниэль Риккардо («Ред Булл – TAG Heuer») иеленді. Жарыс «Америка трассасында» өтті.

2022 жыл – нидерландылық Макс Ферстаппен («Ред Булл») АҚШ Гран-приінде жеңіске жетті. Британиялық Льюис Хэмилтон («Мерседес») екінші болып мәреге жетсе, монаколық Шарль Леклер («Феррари») үздік үштікті түйіндеді. АҚШ Гран-приінің тарихтағы 51-жарысы «Америка трассасында» өтті.

Джо Фрейзердің Олимпиададағы жеңісі және КСРО баскетбол құрамасының жеңілісі

1964 жыл – Токиода өткен Олимпиада ойындарында бірнеше маңызды оқиға тіркелді.

Ауыр салмақтағы америкалық аты аңызға айналған боксшы Джо Фрейзер алтын медаль жеңіп алды. Финалда ол төрешілер шешімімен германиялық Ханс Хуберден басым түсті. Кейін кәсіпқой бокста Фрейзер ауыр салмақта абсолютті әлем чемпионы атанды. Ол «Рокки» фильмдер сериясындағы Рокки Бальбоа кейіпкерінің прототиптерінің бірі саналады.

Сондай-ақ АҚШ баскетбол құрамасы финалда КСРО командасын 73:59 есебімен жеңіп, Олимпиада чемпионы атанды.

Олимпиада рекордтарының тарихынан

1968 жыл – америкалық жүзуші Кей Холл Мехикода өткен Олимпиада ойындарында алтын медаль жеңіп алды. Ол 100 метрге арқамен жүзуде 1 минут 6,2 секунд нәтижесімен әлемдік рекорд орнатты.

«Соңғы императордың» нокауты

2021 жыл – аралас жекпе-жек шебері Федор Емельяненко Мәскеуде өткен Bellator 269 турнирінің басты жекпе-жегінде америкалық Тимоти Джонсонды бірінші раундта нокаутқа түсірді. Бұл ресейлік файтердің мансабындағы 40-жеңісі болды.

23 қазанда әлем тарихында болған өзге де оқиғалар

1814 жыл – Лондонда хирург Джозеф Карпью заманауи тарихтағы алғашқы пластикалық оталардың бірін жасады.

1952 жыл – Нью-Йоркте Чарли Чаплиннің «Сахна шамдары» («Огни рампы») фильмінің премьерасы өтті.

1958 жыл – Борис Пастернак әдебиет бойынша Нобель сыйлығының лауреаты атанды.

Бұл күні дүниеге келгендер

1940 жыл – Пеле. Бразилиялық футболшы Эдсон Арантис ду Насименту, әлемге Пеле есімімен танымал. Ол үш дүркін әлем чемпионы атанған. Халықаралық Олимпиада комитетінің бағалауынша, XX ғасырдың үздік спортшыларының бірі. Сондай-ақ ФИФА нұсқасы бойынша XX ғасырдың үздік футболшыларының бірі саналады.

1994 жыл – Шавкат Рахмонов. Қазақстандық UFC файтері, жартылай орта салмақтағы M-1 Global ұйымының бұрынғы чемпионы. 2026 жылғы ақпанда белсенділігінің төмен болуына байланысты америкалық промоушеннің рейтингінен шығарылды. Қазіргі уақытта тізе жарақатынан кейін қалпына келу кезеңінен өтіп жатыр.