Ислам Махачевтің жеңісі мен Флойд Мейвезердің жарқын жекпе-жегі: 21 қазандағы тарихи оқиғалар

Қазақстан

Жанат Жақияновтың кәсіпқой рингтегі соңғы жекпе-жегі

2017 жыл – қазақстандық боксшы Жанат Жақиянов біріктіруші жекпе-жекте ирландиялық Райан Барнеттке төрешілердің бірауыздан шығарған шешімімен есе жіберді. Осы жеңістен кейін Барнетт аса жеңіл салмақта WBA Super және IBF тұжырымдары бойынша әлем чемпионы атанды. Боксшылар рингте 12 раунд өткізді.

Жекпе-жек Солтүстік Ирландияның астанасы Белфастта өтті. Бұл Жақияновтың кәсіпқой рингтегі соңғы кездесуі болды. Оның еншісінде 27 жеңіс (18-і нокаутпен) және екі жеңіліс бар.

Әлем

Автоспорт тарихындағы айтулы күн

1984 жыл – француз автокөлік жарысының шебері Ален Прост (McLaren-TAG) Португалия Гран-приінде жеңіске жетті. Екінші орынды оның командаласы, австриялық Ники Лауда иеленсе, үшінші болып бразилиялық Айртон Сенна мәреге жетті. Жарыс Португалиядағы «Эшторил» тасжолында өтті.

1990 жыл – бразилиялық Нельсон Пике (Benetton-Ford) Жапония Гран-приінде топ жарды. Екінші орынды оның командаласы Роберто Морено иеленді. Ал жапониялық Агури Судзуки үшінші болды. Жарыс «Сузука» автодромында өтті.

2007 жыл – финляндиялық Кими Райкконен (Ferrari) Бразилия Гран-приінде жеңіске жетті. Екінші орынға бразилиялық Фелипе Масса, үшінші орынға испаниялық Фернандо Алонсо тұрақтады. Жарыс Сан-Паулудағы «Интерлагос» тасжолында өтті.

2018 жыл – финляндиялық Кими Райкконен АҚШ Гран-приінде жеңімпаз атанды. Екінші орынды нидерландылық Макс Ферстаппен иеленсе, үшінші болып британиялық Льюис Хэмилтон мәреге жетті. Жарыс АҚШ-тағы «Америкалар трассасында» өтті.

ҰХЛ тарихындағы ерекше белес

1962 жыл – канадалық хоккейші Уильям Гэдсби «Детройт Ред Уингз» құрамында ҰХЛ тұрақты чемпионатында 1000 матч өткізген тарихтағы екінші ойыншы атанды. Бұл межеге одан бұрын оның командаласы Горди Хоу жеткен еді.

Абебе Бикиланың Олимпиададағы тарихи жеңісі

1964 жыл – эфиопиялық марафоншы Абебе Бикила Токиода өткен Олимпиада ойындарында алтын медаль жеңіп алды. Ол 2 сағат 12 минут 11,2 секунд нәтижесімен мәреге жетіп, марафоннан екі дүркін Олимпиада чемпионы атанған тарихтағы алғашқы спортшы болды. Бұған дейін ол 1960 жылы Рим Олимпиадасында да топ жарған еді.

Флойд Мейвезердің жарқын жеңісі

2000 жыл – америкалық боксшы Флойд Мейвезер Мичиганда өткен бокс кешінде Эммануэль Огастесті тоғызыншы раундта техникалық нокаутпен жеңді. Бұл Мейвезердің жеңіл салмақтағы алғашқы жекпе-жегі еді.

Давид Налбандянның сенсациялық жеңісі

2007 жыл – аргентиналық теннисші Давид Налбандян Мадридтегі «Мастерс» турнирінің финалында сол кездегі әлемнің бірінші ракеткасы Роджер Федерерді 1:6, 6:3, 6:3 есебімен жеңді.

1994 жылдан бері Налбандян бір турнир барысында әлемдік рейтингтің үздік үштігіндегі Федерер, Рафаэль Надаль және Новак Джоковичті жеңген тарихтағы үшінші теннисші атанды.

Ислам Махачев пен Александр Волкановскидің қарымта кездесуі

2023 жыл – ресейлік ММА файтері Ислам Махачев Абу-Дабиде (БАӘ) өткен UFC 294 турнирінде австралиялық Александр Волкановскиді бірінші раундта техникалық нокаутпен жеңіп, жеңіл салмақтағы чемпиондық белбеуін қорғады.

Бұл екі спортшының екінші кездесуі еді. Сол жылдың ақпан айында Махачев Волкановскиді төрешілердің бірауыздан шығарған шешімімен жеңіп, жеңіл салмақтағы чемпиондық атағын сақтап қалған болатын.

21 қазандағы басқа тарихи оқиғалар

Беларусьте – Әкелер күні.

Гондураста – Қарулы күштер күні.

1945 жыл – Францияда әйелдер алғаш рет сайлауға қатысу құқығын пайдаланды.

1964 жыл – АҚШ-та Одри Хепберн басты рөлді сомдаған «Менің сұлу ханымым» фильмі экранға шықты.

1997 жыл – Элтон Джонның ханшайым Дианаға арналған «Candle in the Wind» әнінің жаңа нұсқасы поп-музыка тарихындағы ең көп сатылған сингл атанды. Бір ай ішінде оның 31,8 миллион данасы сатылды.

Бұл күні дүниеге келгендер

1991 жыл – Армениялық грек-рим күресінің шебері Артур Алексанян дүниеге келді. Ол Олимпиада ойындарының чемпионы және бірнеше дүркін жүлдегері:

Алтын медаль – Рио-де-Жанейро, 2016 жыл;

Күміс медаль – Токио, 2020 жыл және Париж, 2024 жыл;

Қола медаль – Лондон, 2012 жыл.

2000 жыл – жапониялық үстел теннисшісі Мима Ито дүниеге келді. Ол Токиода өткен 2020 жылғы Олимпиадада Дзюн Мидзута́нимен бірге аралас жұптық сында алтын медаль жеңіп алды. Ито мен Мидзута́ни үстел теннисінен Олимпиада чемпионы атанған Жапонияның алғашқы өкілдері болды.