Нұрсұлтановтың менеджері Рамоспен өтетін титулдық жекпе-жекке пікір білдірді
Фото: Boxing News
Қазақстандық боксшы Мейірім Нұрсұлтановтың менеджері Эгис Климас WBC тұжырымы бойынша уақытша әлем чемпионы Хесус Рамоспен жекпе-жегінің ресми жариялануына қатысты пікір білдірді.
Нұрсұлтанов – Рамос айқасы 19 қыркүйекте АҚШ-тың Сан-Диего қаласында өтеді. Жекпе-жекте Рамосқа тиесілі орта салмақтағы WBC Interim титулы сарапқа салынады. Бұл кездесудің жеңімпазы толыққанды чемпиондық белбеудің міндетті үміткері атанады. Қазіргі чемпион – Карлос Адамес.
«Мейірім үшін өте қуаныштымын, бұл жекпе-жек екі жылдық күтуден кейін ақыры жүзеге асқалы тұр. Сонымен қатар, WBC президенті Маурисио Сулейманның айтуынша, Адамес Нұрсұлтанов – Рамос кездесуінің жеңімпазымен жұдырықтасуы тиіс», – деді Климас.
Айта кетейік, Нұрсұлтанов үшін бұл 2023 жылдан бергі алғашқы жекпе-жек болмақ.
Эгис Климас бокс әлеміндегі бірқатар жұлдыздармен жұмысымен танымал. Оның қатарында Жәнібек Әлімханұлы, Василий Ломаченко бар. Бұған дейін ол Александр Усикпен де қызметтес болған.