«Қайрат» чемпиондықтан айырылған соң Рафаэль Уразбахтин қызметінен кетті
«Қайрат» ФК
Алматылық «Қайрат» клубының бас бапкері Рафаэль Уразбахтин Қазақстан чемпионатында жеңіске жету мүмкіндігінен айырылғаннан кейін қызметінен кету туралы өтініш берді. Оның міндетін уақытша Жора Арутюнян атқарады.
Клубтың баспасөз қызметі 47 жастағы маманмен ынтымақтастықтың тоқтағанын хабарлады. Қызметтен кету туралы бастаманы Уразбахтиннің өзі көтерген, ал клуб басшылығы оның өтінішін қанағаттандырған.
Уразбахтин 2024 жылдың қыркүйегінде Александр Кержаковтың орнына негізгі команданың тізгінін ұстады. Алғашқы маусымының қорытындысы бойынша алматылықтар ҚПЛ-дың алтын медалін жеңіп алды.
2025 жылы «Қайрат» Қазақстан Суперкубогын иеленіп, ел чемпионы атағын қатарынан екінші рет жеңіп алды. Сондай-ақ клуб тарихында алғаш рет УЕФА Чемпиондар лигасының жалпы кезеңіне жолдама алды. Биыл команда еурокубоктердегі өнерін жалғастырып, Конференциялар лигасының жалпы кезеңіне шықты.
Уразбахтиннің бас бапкер ретіндегі соңғы матчы ҚПЛ-дың 29-туры аясында «Ақтөбеге» қарсы сырт алаңда өтті. Кездесу 2:2 есебімен аяқталды. Осы нәтижеден кейін «Қайрат» чемпиондық атағын қатарынан үшінші рет жеңіп алу мүмкіндігінен біржола айырылды.
Ал Шымкенттің «Ордабасы» клубы турнир аяқталуына бір тур қалғанда чемпиондықты мерзімінен бұрын қамтамасыз етті. Шымкенттік команда алматылықтардан төрт ұпайға озып кетті.
Бас бапкердің міндетін атқарушы болып Жора Арутюнян тағайындалды. Ол бұған дейін Бірінші лигада өнер көрсететін «Қайрат-Жастар» командасын жаттықтырған. Сәуір айында Қазақстан кубогы аясындағы «Қайсарға» қарсы матчта негізгі команданы да басқарған.
Айта кетейік, Арутюнянның жетекшілігімен «Қайрат» Қазақстан чемпионатының соңғы матчына дайындалады. 30-тур аясындағы «Алтайға» қарсы кездесу 31 қазанда Алматыда өтеді.