Қазақстан құрамасының Токиодағы «қола» күні және Асу Алмабаевтың UFC-дегі алғашқы жекпе-жегі: спорт тарихындағы бұл күн

Қазақстан

Қазақстан спортшылары Токио Олимпиадасында үш қола медаль жеңіп алды

2021 жыл – осы күні қазақстандық спортшылар Токиода өткен Олимпиада ойындарында үш қола медаль иеленді:

Боксшы Сәкен Бибосынов жартылай финалда төрешілердің бөлек шешімімен британдық Галаль Яфайға 2:3 есебімен жеңіліп қалды;

Еркін күрес балуаны Нұрислам Санаев қола жүлде үшін кездесуде болгариялық Георгий Вангеловты 5:1 есебімен жеңді;

Каратист Дархан Асадилов жартылай финалда франциялық Стивен да Костаға 2:5 есебімен есе жіберді.

Асу Алмабаевтың UFC-дегі дебюті

2023 жыл – осы күні қазақстандық ММА спортшысы Асу Алмабаев әлемдегі ең ірі промоушен – UFC ұйымындағы алғашқы жекпе-жегін өткізді.

UFC on ESPN 50 турнирінде Нэшвилл қаласында өткен кездесуде қазақстандық файтер екінші раундта ямайкалық Оди Осборнды тұншықтыру әдісімен жеңді. Жекпе-жек ең жеңіл салмақ дәрежесінде өтті.

Қазіргі уақытта Алмабаев америкалық промоушенде жеті жеңіс пен бір жеңіліске ие. Ол өз салмақ дәрежесінің рейтингінде бесінші орында тұр.

Әлем

1956 жыл – осы күні «Ferrari» командасының аргентиналық ұшқышы Хуан Мануэль Фанхио Германия Гран-при жарысының жеңімпазы атанды. Екінші және үшінші орындарды сәйкесінше «Maserati» командасының британдық өкілі Стирлинг Мосс пен француз Жан Бера иеленді. Жарыс Нюрбургринг тас жолында өтті.

Әйелдер арасындағы алғашқы Олимпиада марафонының чемпионы

1984 жыл – осы күні америкалық ұзақ қашықтыққа жүгіруші Джоан Бенуа Лос-Анджелесте өткен алғашқы әйелдер арасындағы Олимпиадалық марафонның (42 км 195 м) жеңімпазы атанды.

Оның нәтижесі – 2:24:52. Екінші орынды норвегиялық жеңіл атлет Грете Вайц (2:26:18), ал үздік үштікті португалиялық Роза Мота (2:26:57) түйіндеді.

Рио-де-Жанейрода басты спорт мерекесі басталды

2016 жыл – осы күні Бразилияның Рио-де-Жанейро қаласында XXXI жазғы Олимпиада ойындары ашылды. Ойындардың салтанатты ашылу рәсімі «Маракана» стадионында өтті.

Олимпиада алауын бразилиялық марафоншы, Афина Олимпиадасының қола жүлдегері Вандерлей Кордейру де Лима жақты. Ашылу салтанатының бюджеті салыстырмалы түрде аз болды – 20 миллион доллар. Мысалы, Лондон Олимпиадасында бұл шараға екі есе көп қаржы жұмсалған еді. Соған қарамастан, әлемдік БАҚ ашылу рәсіміне жоғары баға берді. Салтанатты шара Бразилияның тарихы мен мәдениетіне, сондай-ақ жаһандық климат мәселелеріне арналды.

Рио Олимпиадасында Қазақстан құрамасының туын таэквондошы Руслан Жапаров ұстап шықты. Бұл Олимпиадада қазақстандық спортшылар өздерінің рекордтық көрсеткішіне қол жеткізіп, 17 медаль жеңіп алды. Нәтижесінде Қазақстан құрамасы жалпыкомандалық медаль есебінде 30-орынға жайғасты.

Джейк Пол UFC жұлдыздарын жеңістер тізімін толықтырды

2023 жыл – осы күні UFC аңызы Нейт Диас Далласта өткен үлкен бокс кешінде америкалық боксшы әрі видеоблогер Джейк Полға жеңілді.

Кәсіпқой бокс ережесі бойынша өткен он раундтық дебюттік жекпе-жегінде Диас төрешілердің бірауызды шешімімен жеңіліс тапты. Кездесу бірінші ауыр салмақ дәрежесінде өтті.

Диасты жеңгенге дейін Джейк Пол UFC ұйымының бірнеше танымал файтерін жеңген болатын. Олардың қатарында Бен Аскрен, Тайрон Вудли және Андерсон Силва бар.

Бұл күні дүниеге келгендер:

1962 жыл – Патрик Юинг, америкалық баскетболшы. Мансабының басым бөлігін «Нью-Йорк Никс» сапында өткізген. НБА тарихындағы ең ұлы 50 ойыншының қатарына енген.

1982 жыл – Лоло Джонс, америкалық жеңіл атлет және бобслейші. Жабық кешендегі әлем чемпионаттарының екі дүркін жеңімпазы (Валенсия-2008, Доха-2010).