Қазақстандықтар Олимпиада тұғырын бағындырды, ал Шумахерлер Венгрия Гран-приінде жеңіске жетті: спорт тарихындағы бұл күн

Қазақстан

Рио Олимпиадасындағы Қазақстанның медальды күні

2016 жыл — дәл осы күні қазақстандық спортшылар Бразилияның Рио-де-Жанейро қаласында өткен Олимпиада ойындарында үш медаль жеңіп алды:

Боксшы Адильбек Ниязымбетов Олимпиада ойындарының екі дүркін күміс жүлдегері атанды. Риодағы Олимпиаданың финалында ол төрешілердің бірауызды шешімімен кубалық Хулио Ла Крусқа есе жіберді.

Екатерина Ларионова (63 кг) әйелдер күресінен қола медаль иеленді. Қола үшін белдесуде ол америкалық Елена Пирожкованы 4:3 есебімен жеңді.

Гюзель Манюрова (75 кг) өзінің қоржынына үшінші Олимпиада медалін қосты. Рио ойындарының финалында ол канадалық Эрика Элизабет Уибеге 0:6 есебімен жол беріп, күміс медаль алды.

Гюзель Манюрова — Олимпиаданың екі дүркін күміс жүлдегері (Афины-2004, Рио-де-Жанейро-2016) және қола жүлдегері (Лондон-2012).

Әлем

Ауыр салмақтағы чемпионның кезекті жеңісі

1958 жыл — осы күні америкалық ауыр салмақтағы боксшы Флойд Паттерсон Лос-Анджелестегі жекпе-жекте отандасы Рой Харристі жеңіп, абсолютті әлем чемпионы атағын қатарынан үшінші рет қорғады.

Жекпе-жектің 12-раундында Харрис кездесуді жалғастырудан бас тартты.

Автоспорт тарихынан

1985 жыл — осы күні «McLaren-TAG» командасының француздық пилоты, Формула-1-дің төрт дүркін чемпионы Ален Прост Австрия Гран-приінің жеңімпазы атанды.

Екінші орынға «Lotus-Renault» командасының аты аңызға айналған бразилиялық пилоты Айртон Сенна жайғасты. Ал үздік үштікті «Ferrari» өкілі Микеле Альборето түйіндеді. Жарыс Остеррайхринг автодромында өтті.

NBA-дың 12 дүркін жұлдыздар ойынына қатысушы Ларри Бёрд үлкен спортпен қоштасты

1992 жыл — осы күні атақты америкалық баскетболшы Ларри Бёрд кәсіби мансабын аяқтайтынын жариялады.

Ол 13 жыл бойы «Бостон Селтикс» сапында өнер көрсетіп, команданы NBA-дың үш чемпиондық титулына жеткізді.

Баскетболдағы еңбегі үшін Ларри Бёрд NBA тарихындағы ең ұлы 50 ойыншының қатарына енгізілді. Сондай-ақ ол NBA жұлдыздар ойынына 12 рет қатысқан.

Ағайынды Шумахерлер Венгрия Гран-приінде үздік үштікке кірді

2002 жыл — осы күні «Ferrari» командасының бразилиялық пилоты Рубенс Баррикелло Венгрия Гран-приінде жеңіске жетті.

Екінші болып оның командаласы, атақты неміс автошабандозы Михаэль Шумахер мәреге жетті. Ал үшінші орынды оның інісі, «Williams-BMW» командасының пилоты Ральф Шумахер иеленді.

Жарыс Будапешттегі «Хунгароринг» автодромында өтті.

Елена Исинбаева тағы да Олимпиада чемпионы атанды

2008 жыл — осы күні ресейлік сырықпен секіруші Елена Исинбаева Бейжің Олимпиадасында алтын медаль жеңіп алды.

Сонымен қатар ол 5,05 метр нәтижесімен әлемдік рекорд орнатты.

Бұған дейін Исинбаева 2004 жылғы Афины Олимпиадасында да чемпион атанған болатын.

Бұл күні дүниеге келгендер

1980 жыл — Сергей Харитонов, ресейлік ММА файтері. Ол Pride, M-1, RCC, Bellator сияқты промоушендердегі жекпе-жектерімен танымал.

1987 жыл — Йоанна Енджейчик, польшалық ММА файтері. UFC әйелдер арасындағы ең жеңіл салмақ дивизионының бұрынғы чемпионы.