Қазақстанның бірінші ракеткасы Монтеррейдегі турнирдің ширек финалына шықты
Фото: Jimmie48
Қазақстанның бірінші ракеткасы әрі WTA жұптық рейтингінде алтыншы орында тұрған Анна Данилина жапониялық Мию Като жұбымен бірге Монтеррейде өтіп жатқан WTA-500 турнирінің ширек финалына шықты.
Қазақстандық және жапониялық теннисшілер бірінші айналымда қытайлық Тан Цяньхуэй мен мексикалық Рената Сарасуамен кездесті. Данилина мен Като алғашқы партияда жеңіліп қалғанымен, матч барысын өзгертіп, 4:6, 6:2, 10:6 есебімен жеңіске жетті. Кездесу 1 сағат 23 минутқа созылды.
Жеңімпаздар бір эйс жасап, бес рет қосарланған қателік жіберді және брейк-пойнттардың төртеуін пайдаланды. Ал Тан мен Сарасуа екі рет эйс орындап, бір қосарланған қателікке жол берді және қарсыластарының алты брейк-пойнтының үшеуін қайтарды.
Жартылай финалға шығу үшін Данилина мен Като Мария Козырева және Майя Ламсден жұбымен кездеседі. Олар турнирді Тереза Михаликова мен Оливия Николлсты 7:5, 6:3 есебімен жеңуден бастады.
