Қонқабаевтың Париж Олимпиадасындағы жеңілісі және Цзюдің жарқын жеңісі: спорт тарихындағы бұл күн

Қазақстан:

Жас қазақстандық боксшы тәжірибелі америкалықты жеңді

2011 – осы күні қазақстандық боксшы Бейбіт Шүменов Лас-Вегаста өткен жекпе-жекте америкалық Дэнни Сантьягоды тоғызыншы раундта техникалық нокаутпен жеңді. Бұл жеңісінің арқасында ол жартылай ауыр салмақта WBA және IBA тұжырымдары бойынша чемпиондық белбеулерін сәтті қорғап қалды. Жекпе-жек кезінде Шүменов 27 жаста болса, қарсыласы 38 жаста еді.

Қамшыбек Қонқабаев екінші Олимпиада медалінен қағылды

2024 – осы күні аса ауыр салмақта өнер көрсететін қазақстандық боксшы Қамшыбек Қонқабаев Париж Олимпиадасындағы алғашқы жекпе-жегінде жеңіліп қалды. Ол төрешілер шешімімен (2:3) Ташкенттегі әлем чемпионатының қола жүлдегері, испаниялық Айюб Гадфа Дриссиге жол берді. Осылайша, Қонқабаев турнирдің бастапқы кезеңінде-ақ жарыс жолынан шығып, мансабындағы екінші Олимпиада медалін алу мүмкіндігінен айырылды. Айта кетейік, 2021 жылы Токио Олимпиадасында ол қола жүлде иеленген болатын.

Әлем:

«Спартандық» Олимпиада

1948 – осы күні Лондондағы «Уэмбли» стадионында XIV жазғы Олимпиада ойындарының ашылу салтанаты өтті. Бұл Екінші дүниежүзілік соғыстан кейінгі 12 жылдық үзілістен соң өткен алғашқы Олимпиада еді.

Ұлыбритания королі Георг VI ойындарды ресми түрде ашық деп жариялады. 85 мың көрерменнің алдында аспанда екі жарым мың көгершін ұшырылып, Олимпиада алауын британдық жеңіл атлет, спринтер Джон Марк жақты.

Бұл Олимпиада ауыр соғыстан кейінгі жағдайға байланысты «қатаң» немесе «спартандық» деп аталды. Себебі спортшылар үшін жаттығу жағдайлары өте қарапайым болды және бұл ойындарға арнап бірде-бір жаңа спорт нысаны салынбады.

Майкл Джонсонның Олимпиададағы триумфы

1996 – осы күні америкалық жеңіл атлет, спринтер Майкл Джонсон Атлантада өткен Олимпиада ойындарында 400 метр қашықтықта «алтын» медаль жеңіп алды – 43,49 с.

Жалпы Атланта Олимпиадасында Джонсон екі алтын медаль иеленіп, 200 және 400 метр қашықтықтарында жеңіске жетіп, дубль жасады. 200 метрде ол 19,32 секунд нәтиже көрсетіп, 12 жыл бойы жаңармай тұрған олимпиадалық рекорд орнатты. Кейін бұл көрсеткішті Усэйн Болт жаңартты.

Костя Цзюдің тарихи жеңісі

2000 – осы күні ресейлік-австралиялық боксшы Костя Цзю аңызға айналған мексикалық боксшы Хулио Сезар Чавесті жеңіп, WBC тұжырымы бойынша бірінші жартылай орта салмақтағы чемпиондық белбеуін қорғап қалды. Алтыншы раундта Чавес ауыр нокдаунға түскенімен, жекпе-жекті жалғастырды. Алайда кейін Цзю қарқынын күшейтіп, төреші Бобби Феррар кездесуді тоқтатты. Осылайша, Цзю төрт салмақта алты дүркін әлем чемпионы Чавесті техникалық нокаутпен жеңді.

Янник Аньель Лондон Олимпиадасының чемпионы атанды

2012 – осы күні француз жүзушісі Янник Аньель Лондонда өткен Олимпиада ойындарында 4×100 метр еркін стильдегі эстафетада «алтын» медаль жеңіп алды. Ол жарыста алты дүркін Олимпиада чемпионы Райан Лохтені сенсациялық түрде артта қалдырды. Келесі күні Аньель 200 метр еркін стильде тағы бір алтын медаль еншіледі.

Ортега қарсыласына мүмкіндік қалдырмады

2017 – осы күні америкалық ММА шебері Брайан Ортега Анахаймда өткен UFC 214 турнирінде бразилиялық Ренато Мойканоны үшінші раундта тұншықтыру әдісімен жеңді. Жекпе-жек жартылай жеңіл салмақта өтті. Бұл жеңісі үшін Ортега «Кештің үздік жекпе-жегі» номинациясы бойынша 50 000 доллар бонус алды.

Бұл күні туғандар:

1981 – Фернандо Алонсо, испаниялық автогонщик, «Формула-1»-дің екі дүркін чемпионы.

1991 – Орландо Ортега, кубалық текті испаниялық жеңіл атлет, Рио-де-Жанейро Олимпиадасының күміс жүлдегері.

1997 – Әбілхан Аманқұл, қазақстандық боксшы, Гамбургтегі әлем чемпионатының күміс жүлдегері.