«Қызыл фурия» қайтадан Еуропаның үздігі, ал Винокуров Францияда жеңіске жетті: спорт тарихындағы бұл күн

Қазақстан велоспортының беттері

2003 – осы күні қазақстандық велошабандоз Александр Винокуров (Team Telekom) «Тур де Франс» көпкүндік жарысының 9-кезеңінде (Бург-д'Уазан – Гап, 184,5 км) жеңіске жетті. Ол 5:02:00 уақыт көрсетіп, ең жақын қарсыласынан 36 секундқа озып келді. Біраз уақыттан кейін Винокуров «Тур де Франстың» қола жүлдегері атанды.

Әлем:

«Қызыл фурия» Еуропаны тағы да бағындырды

2024 – осы күні Берлиндегі «Олимпиаштадион» стадионында өткен футболдан Еуропа чемпионатының финалында Испания құрамасы Англияны 2:1 есебімен жеңді. Жартылай қорғаушы Нико Уильямс пен шабуылшы Микель Оярсабаль Испанияға тарихи жеңіс сыйлады, ал Англия құрамасының жалғыз голын Коул Палмер соқты. Осы жеңістің арқасында Испания ЕУРО турнирін төрт рет жеңіп алған алғашқы команда атанды. Бұған дейін испандар 1964, 2008 және 2012 жылдары чемпион болған.

Джокович пен Федерердің бес сағаттық шайқасы Уимблдон тарихына енді

2019 – осы күні сербиялық теннисші Новак Джокович Уимблдон тарихындағы ең ұзақ финалда Роджер Федерерді жеңді – 4 сағат 57 минут. Бұған дейінгі рекорд 2008 жылғы финалға тиесілі болған (Рафаэль Надаль – Федерер, 6:4, 6:4, 6:7, 6:7, 9:7). Джокович екі матчболды қайтарып, Лондондағы турнирдегі бесінші титулын жеңіп алды.

«Пампа бұқасының» тарихи жеңісі

1951 – осы күні аргентиналық автожарысшы Хосе-Фройлан Гонсалес Ұлыбритания Гран-приін жеңіп, «Феррари» командасына Формула-1 тарихындағы алғашқы жеңісті сыйлады. Ол «Пампа бұқасы» лақап атымен танымал болған және 26 жарысқа қатысып, оның екеуінде жеңіске жеткен (екеуі де Сильверстоунда).

Дэнни Гарсия Амир Ханды тоқтатты

2012 – осы күні бірінші жартылай орта салмақтағы WBC чемпионы Дэнни Гарсия Лас-Вегаста өткен бокс кешінде британдық боксшы Амир Ханды жеңді. Жекпе-жекке дейін Амир Хан IBF нұсқасы бойынша бұрынғы чемпион және WBA белбеуінің иегері болған. Көптеген мамандар оны фаворит санаған.

Төртінші раундта Гарсия Амир Ханды нокдаунға жіберіп, содан кейін төреші жекпе-жекті тоқтатты. Нәтижесінде техникалық нокаутпен жеңіс тіркелді. Осы жеңістен кейін Гарсия бірден екі нұсқа бойынша – WBC және WBA чемпионы атанды.

Хэмилтон өз елінде жеңіске жетті

2019 – осы күні Формула-1-дің үздік пилоттарының бірі, британдық Mercedes командасының өкілі Льюис Хэмилтон мансабында алтыншы рет Ұлыбритания Гран-приінде жеңіске жетті. Екінші болып оның командаласы Валттери Боттас мәреге жетсе, үшінші орынды Шарль Леклер (Ferrari) иеленді. Осылайша, Хэмилтон бұл кезеңдегі алтыншы жеңісін алып, Ален Прост пен Джим Кларктың (бес жеңіс) рекордын жаңартты. Қазіргі таңда Хэмилтонның еншісінде Ұлыбритания Гран-приінде 9 жеңіс бар.

Футбол матчы қалай әскери қақтығысқа ұласты

1969 – осы күні Сальвадор мен Гондурас арасында «Футбол соғысы» деп аталатын қақтығыс басталды. Бұған бірнеше күн бұрын өткен футболдан әлем чемпионатының іріктеу кезеңіндегі матчтар себеп болған, онда Гондурас құрамасы Сальвадордан жеңілген.

Алайда футбол қақтығыстың басты себебі болмаған, тек тұтануына түрткі болған фактор еді. Екі ел арасында жер дауы мен Сальвадор азаматтарының Гондурасқа жаппай қоныс аударуы мәселелері бұрыннан бар еді.

14 шілде күні таңғы 05:30-да Сальвадор авиациясы өз азаматтарын қорғау сылтауымен Гондурастың әскери базасы мен мұнай қоймасына соққы жасады. Ұрыс қимылдары 100 сағаттан астам уақытқа созылып, әскери қызметкерлер мен бейбіт тұрғындар арасында көптеген шығынға әкелді.

Бұл күні дүниеге келгендер:

1988 – Конор Макгрегор, ирландиялық UFC жауынгері. Ұйым тарихындағы бір мезгілде екі салмақта (жартылай жеңіл және жеңіл) чемпиондық белбеулерді иеленген алғашқы спортшы.

1990 – Федерика Бриньоне, италиялық тау шаңғышысы, 2026 жылы Милан мен Кортина-д’Ампеццода өткен Олимпиада ойындарының екі дүркін чемпионы.

1989 – Роман Креч, қазақстандық конькиші-спринтер, 2010 және 2014 жылғы Олимпиада ойындарының қатысушысы.

1969 – Кадзуси Сакураба, жапониялық аралас жекпе-жек шебері, UFC және Pride ұйымдарының ардагері.