Серік Сәпиевтің Лондон Олимпиадасындағы «алтыны» және Холифилд – Руис трилогиясының басталуы: спорт тарихында бұл күн

Қазақстан

Қазақстандықтардың Лондондағы триумфы

2012 жыл — осы күні қазақстандық спортшылар Лондон Олимпиадасында үш медаль жеңіп алды:

Серік Сәпиев (69 кг) бокс бойынша Олимпиада чемпионы атанды. Финалда ол британдық Фредди Эвансты 17:9 есебімен жеңді. Сәпиев Василий Жиров пен Бақтияр Артаевтан кейін Олимпиада ойындарының ең шебер боксшысына берілетін Вэл Баркер кубогын алған үшінші қазақстандық боксшы атанды.

Әділбек Ниязымбетов (81 кг) Олимпиаданың күміс жүлдесін иеленді. Финалда қазақстандық боксшы ресейлік Егор Мехонцевпен жұдырықтасты. Жекпе-жек 15:15 есебімен аяқталғанымен, төрешілер қосымша көрсеткіштер бойынша жеңісті Мехонцевке берді. Ниязымбетов төрт жылдан кейін Рио-де-Жанейро Олимпиадасында да күміс медаль жеңіп алды.

Ақжүрек Таңатаров (66 кг) еркін күрестен қола медаль үшін белдесуде 2008 жылғы Бейжің Олимпиадасының чемпионы, түркиялық Рамазан Шахинді 2:1 есебімен жеңді.

Әлем

ПСЖ-ның құрылған күні

1970 жыл — осы күні Франция астанасында мықты команда құру мақсатында жас «Париж» клубы мен қала маңындағы «Стад Сен-Жермен» бірікті. Осылайша «Пари Сен-Жермен» (ПСЖ) клубы құрылды.

Оның негізін қалаушылар — Ги Крессан, Пьер-Этьен Гийо және Анри Патрель. Клуб құрылған алғашқы жылдардан-ақ жетістіктерге жетіп, екінші дивизионға көтерілді.

Олимпиада тарихынан

1984 жыл — осы күні Лос-Анджелесте өткен XXIII жазғы Олимпиада ойындары ресми түрде аяқталды.

Жарысқа 140 елден 6829 спортшы қатысты. Олимпиадаға алғаш рет Қытай мен Колумбия құрамалары қатысты. КСРО және бірқатар социалистік елдер бұл Олимпиадаға бойкот жариялап, жарысқа қатыспады.

Ойындарда спорттың 23 түрінен 221 медальдар жиынтығы сарапқа салынды. Медальдар кестесінде АҚШ, Румыния және ГФР құрамалары алғашқы үш орынды иеленді.

Олимпиаданың басты қаһарманы америкалық жеңіл атлет Карл Льюис атанды. Ол төрт Олимпиада алтынын жеңіп алды.

Автоспорт тарихынан

1990 жыл — осы күні бельгиялық Williams-Renault командасының пилоты Тьерри Бутсен Венгрия Гран-приінде жеңіске жетті. Екінші және үшінші орындарды бразилиялықтар — McLaren-Honda сапындағы Айртон Сенна мен Benetton-Ford өкілі Нельсон Пике иеленді. Жарыс Хунгароринг автодромында өтті.

Эвандер Холифилд пен Джон Руис арасындағы трилогияның басталуы

2000 жыл — осы күні әлемдік бокс аңызы Эвандер Холифилд Лас-Вегаста өткен жекпе-жекте америкалық Джон Руисті төрешілердің бірауызды шешімімен жеңіп, аса ауыр салмақтағы WBA нұсқасы бойынша әлем чемпионы атанды.

Жекпе-жек толық 12 раундқа созылды. Осы жеңісінің арқасында Холифилд кәсіпқой бокста аса ауыр салмақта төрт рет әлем чемпионы атанған алғашқы әрі жалғыз боксшы болды.

Холифилд пен Руистің екінші кездесуі 2001 жылдың наурызында өтті. Бұл жолы Руис төрешілердің бірауызды шешімімен жеңіп, WBA чемпиондық белдігін Холифилдтен тартып алды.

Үшінші жекпе-жек 2001 жылдың желтоқсанында өтті. Руис WBA белдігін сақтап қалды. Төрешілер жекпе-жекті бөлінген шешіммен тең аяқтады.

Бұл күні дүниеге келгендер

1971 — Пит Сампрас, америкалық теннисші, әлемнің бұрынғы бірінші ракеткасы, АҚШ құрамасымен Дэвис кубогының екі дүркін жеңімпазы, жекелей сында «Үлкен дулыға» турнирлерінің 14 дүркін чемпионы.

1990 — Марио Балотелли, италиялық футболшы, «Аль-Иттифак» клубының шабуылшысы, УЕФА Чемпиондар лигасының 2009/10 жылғы жеңімпазы. Италияның үш дүркін чемпионы («Интер») және Англия чемпионы («Манчестер Сити»).

1991 — Эмиль Иверсен, норвегиялық шаңғышы, Олимпиада чемпионы, әлемнің төрт дүркін чемпионы.

2006 — Анхель Барахас, колумбиялық гимнаст, Париж Олимпиадасының күміс жүлдегері.

2008 — Дастан Сәтпаев, қазақстандық футболшы, Англияның «Челси» клубы мен Қазақстан құрамасының шабуылшысы.