Швейцария хоккейден әлем чемпионатында Германияны тас-талқан етті
Фото: Getty Images
Швейцария құрамасы хоккейден әлем чемпионатының топтық кезеңінде Германияны ірі есеппен жеңді. Цюрихте өткен кездесу 6:1 есебімен аяқталды.
Швейцариялықтар есепті 26-минутта Денис Мальгиннің шайбасымен ашты. Одан кейін Свен Андригетто, Кристоф Берчи, Нико Хишир және Роман Йози мергендік танытты. Андригетто дубль авторы атанып, командасының алтыншы шайбасын соқты. Германия құрамасының сапынан 56-минутта Фредерик Тиффельс жалғыз голмен жауап қатты.
Осы жеңістен кейін Швейцария құрамасы тоғыз ұпай жинап, A тобында екінші орынға көтерілді. Олар тек соққан және жіберген шайбалардың айырмасы бойынша Финляндияға жол беріп тұр. Ал Германия құрамасы әзірге бірде-бір ұпай жинай алмай, турнир кестесінің соңын түгендеуде.
Әлем чемпионаты 15 пен 31-мамыр аралығында Цюрих және Фрибур қалаларында өтіп жатыр. Швейцария мен Германия - АҚШ, Финляндия, Латвия, Аустрия, Мажарстан және Ұлыбритания құрамаларымен бір топта өнер көрсетуде.