Усик Верхувеннен жеңілер болса IBF белбеуінен айырылады
Фото: IBF
Халықаралық бокс федерациясы (IBF) украиналық Александр Усиктің нидерландтық Рико Верхувенге қарсы жекпе-жекте чемпиондық титулын қандай жағдайда сақтап қалатынын мәлімдеді.
Егер Усик 23 мамыр күні жеңілсе, IBF нұсқасы бойынша аса ауыр салмақтағы чемпиондық белбеу бірден вакантты деп жарияланады. Алайда, Верхувен осы айқаста жеңіске жетсе де бұл титулды иелене алмайды. Ал украиналық боксшы жеңіске жеткен жағдайда титулды сәтті қорғады деп есептеледі.
Бұған дейін WBA ұйымы да осындай шешім шығарған болатын: Усик жеңсе — белбеу өзінде қалады, ал егер Верхувен жеңімпаз шықса чемпион атана алмайды.
Верхувенмен жекпе-жектен кейін Усик 180 күн ішінде IBF тұжырымы бойынша кезекті титулды қорғау кездесуін өткізуге міндеттеледі.
Сондай-ақ, WBC ұйымы да осыған ұқсас шартты ресми түрде мақұлдаған. Промоутер Фрэнк Уорреннің айтуынша, егер Усик міндетті үміткер Агит Кабайелге қарсы жекпе-жек өткізбесе, чемпиондық белбеуден айырылуы мүмкін.
Усик пен Верхувен арасындағы кездесу Мысырда өтетін Glory in Giza турнирінің басты оқиғасы болады.