«Үзіліс аяқталды»: Тағыберген «Тобылдың» еурокубоктарға оралуы алдында пікір білдірді

Ойын алдында қостанайлық клубтың капитаны Асхат Тағыберген команданың дайындығы туралы айтып, футболшылардың бұл ойынға ерекше көңіл-күймен келіп отырғанын атап өтті.

«Тобыл» Паневежис қаласына жетіп, алдағы матчқа соңғы дайындықтарын жүргізуде. Тағыбергеннің айтуынша, команда халықаралық кездесулерді сағынған, ал бір жылдық үзіліс ойыншыларға қосымша мотивация берген.

«Дайындық жақсы өтіп жатыр. Біз еурокубоктарда қайта ойнағанымызға қуаныштымыз. Командада бір жылдық үзіліс болды, сондықтан бұл матчқа барынша байыппен қарап отырмыз. Жеңіске жеткіміз келеді және өзімізді толық дайынбыз деп санаймыз», – деді «Тобыл» капитаны.

Тағыберген капитандық рөл туралы да пікір білдірді. Оның айтуынша, көшбасшы тек алаңда үлгі көрсетіп қана қоймай, әрбір ойыншымен тіл табыса білуі керек.

«Капитандық таңба – ең алдымен жауапкершілік пен адами қасиеттер. Әр футболшының мінезі әртүрлі, сондықтан оларды түсіну, қолдау көрсету және сенімділік ұялату өте маңызды», – деді ол.

Капитанның сөзінше, «Тобыл» биылғы маусымды сәтті бастап, Қазақстан Суперкубогын жеңіп алған. Сонымен қатар, клуб әрдайым жоғары мақсаттар қояды және еурокубоктарда тәжірибесі бар.

Тағыберген 2021 және 2022 жылдары да «Тобыл» сапында өнер көрсеткенін еске салды. 2021 жылы команда Қазақстан чемпионы атанған, ал жалпы клуб Суперкубокты үш рет жеңіп алған.

«Футболда үнемі жеңе беру мүмкін емес. Жеңілістер де болады, бірақ олар бізді күшейтеді. Қазір біз тактика мен ойын ұйымдастыру жағынан жақсардық. Дегенмен, чемпионат пен еурокубок екі түрлі деңгей. Халықаралық матчтар ерекше дайындықты талап етеді, сондықтан ертең соңына дейін күресеміз», – деді Тағыберген.

«Паневежис» – «Тобыл» матчы 23 шілде күні «Аукштайтия» стадионында өтеді. Ойын Қазақстан уақытымен 20:30-да басталады.

Қарымта кездесу 30 шілдеде Қостанайда өтеді. Екі ойынның қорытындысы бойынша УЕФА Конференциялар лигасының келесі кезеңіне өтетін команда анықталады.