Жапониядағы жойқын тайфун және Кличконың қарсыласының көз жасы: әлем тарихындағы бұл күн

«МЮ»-дың жарқын жеңісі

1956 жыл – бұл күні «Манчестер Юнайтед» Еуропа чемпиондары кубогының (қазіргі УЕФА Чемпиондар лигасы) іріктеу кезеңінің екінші матчында «Андерлехтті» 10:0 есебімен ойсырата жеңді. Бұл – «Қызыл сойқандардың» еурокубоктардағы ең ірі жеңісі. Голдарды Тейлор (8, 20, 54-минуттар), Вайоллет (26, 39, 40, 75), Уилан (63, 89) және Берри (78) соқты. Матч сол кездегі «Манчестер Юнайтедтің» үй стадионы болған «Мейн Роудта» өтті.

Боб Фостердің нокауты

1972 жыл – бұл күні америкалық боксшы Боб Фостер Лас-Вегаста өткен жекпе-жекте британдық Крис Финниганды 14-раундта нокаутқа түсірді. Осы жеңісінің арқасында Фостер жартылай ауыр салмақтағы WBC нұсқасы бойынша әлем чемпионы атағын қорғап қалды. Бокске арналған беделді The Ring басылымы бұл жекпе-жекті «Жыл жекпе-жегі» деп таныды.

Автоспорт тарихынан

1993 жыл – бұл күні атақты неміс автокөлік жүргізушісі Михаэль Шумахер (Benetton-Ford) Португалия Гран-приінде жеңіске жетті. Екінші орын француз Ален Простқа (Williams-Renault) бұйырды. Үздік үштікті Простың командаласы, британдық Деймон Хилл түйіндеді. Осы Гран-при кезінде Ален Прост Формула-1-дегі төртінші чемпиондық атағын мерзімінен бұрын қамтамасыз етті.

Моника Селештің Олимпиададағы «қоласы»

2000 жыл – бұл күні америкалық-югославиялық атақты теннисші Моника Селеш Сидней Олимпиадасының қола жүлдегері атанды. Үшінші орын үшін өткен матчта Селеш австралиялық Екатерина Докичті 6:1, 6:4 есебімен жеңді. Осылайша «Үлкен дулыға» турнирлерінің бірнеше дүркін жеңімпазы Селеш мансабындағы алғашқы әрі жалғыз Олимпиада медалін иеленді.

Жас айырмашылығы үлкен чемпиондық жекпе-жек

2003 жыл – бұл күні жартылай ауыр салмақтағы ең тартысты жекпе-жектердің бірі өтті. UFC 44 турнирінде америкалық Рэнди Кутюр отандасы Тито Ортисті төрешілердің бірауыздан шығарған шешімімен жеңді. Жекпе-жек Лас-Вегаста өтті.

Сол кезде Тито Ортис чемпион атанса, Кутюр уақытша чемпиондық белбеуге ие еді. Жекпе-жекке дейін Ортис Кутюрдің жасына қатысты қалжыңдап, психологиялық қысым жасауға тырысты. Екі спортшының жас айырмашылығы 11 жыл болатын. Алайда бес раундқа созылған кездесуде Кутюр октагонда басымдық танытып, толыққанды чемпиондық белбеуді иеленді және жартылай ауыр салмақтағы абсолютті чемпион атанды.

Кличконың америкалық қарсыласы жеңілістен кейін жылады

2009 жыл – бұл күні украиналық боксшы Виталий Кличко америкалық Крис Арреоланы оныншы раундта техникалық нокаутпен жеңіп, WBC нұсқасы бойынша суперауыр салмақтағы чемпиондық белбеуін қорғады.

Оныншы раундқа қарай Арреола қатты шаршап, бірнеше ауыр соққы жіберіп алды. Америкалық боксшының командасы жекпе-жекті мерзімінен бұрын тоқтатып, спортшының денсаулығын сақтауды жөн көрді. Жеңіліске ренжіген Арреола бокс кешіне жиналған жүздеген көрерменнің көз алдында жылап жіберді. Ал жекпе-жектен кейінгі телеарнаға берген сұхбатында балағат сөздер айтқаны үшін WBC рейтингінен алты айға шығарылды.

Геннадий Головкиннің бұрынғы қарсыласы АҚШ-та жеңілді

2020 жыл – бұл күні украиналық боксшы Сергей Деревянченко америкалық Джермалл Чарлоға төрешілердің бірауыздан шешімімен есе жіберіп, WBC нұсқасы бойынша орта салмақтағы әлем чемпионы атағын иелене алмады.

Жекпе-жек толық 12 раундқа созылды. Бұл Деревянченконың чемпиондық белбеу үшін өткен кездесулердегі үшінші жеңілісі болды. Бұған дейін ол IBF нұсқасы бойынша екі рет чемпиондық атаққа таласып, америкалық Дэниел Джейкобс пен қазақстандық Геннадий Головкиннен жеңілген еді.

26 қыркүйек – әлем тарихындағы маңызды оқиғалар

1924 жыл – Мәскеуде КСРО-дағы алғашқы ұшатын модельдер жарысы өтті. Бұл елдегі авиамодель спортының дамуына бастау болды.

1959 жыл – қуатты «Вера» тайфуны Жапониядағы екі миллион тұрғыны бар Нагоя қаласына үлкен шығын келтіріп, қаланың едәуір бөлігін қиратты.

1960 жыл – Куба президенті, мемлекет және партия қайраткері Фидель Кастро БҰҰ тарихындағы ең ұзақ сөз сөйледі. Оның баяндамасы 4 сағат 29 минутқа созылды. Кастро Куба революциясының мағынасы туралы айтып, АҚШ империализмін сынға алды. Оның сөзі Гиннестің рекордтар кітабына енді.

Бұл күні дүниеге келгендер

1981 жыл – Серена Уильямс, америкалық атақты теннисші, мансаптық «Алтын дулыға» иегері, Олимпиада ойындарының төрт дүркін чемпионы (2000 жылғы Сидней, 2008 жылғы Бейжің, 2012 жылғы Лондон).

1994 жыл – Виктория Арлен, жүзуші, актриса және модель. Паралимпиада ойындарының бір алтын және үш күміс медалінің иегері (2012 жылғы Лондон).

2001 жыл – Алина Әділханова, қазақстандық гимнаст. Азияның бірнеше дүркін чемпионы (2016, 2017, 2018, 2021), Азия чемпионаттарының екі күміс және екі қола жүлдегері.