Әлімханұлы екінші орта салмаққа ауысқаннан кейін «Канеломен» жекпе-жек өткізуді көздеп отыр
Фото: Getty Images
Жәнібек Әлімханұлының екінші орта салмақ дәрежесіне ауысуы оның келесі мақсатын бірден айқындады. Қазақстандық боксшы жаңа дивизионға өткенін жариялағаннан кейін көп күтпей, Сауль «Канело» Альвареске үндеу жасады.
Жәнібек Әлімханұлы Instagram-дағы сторисінде Сауль «Канело» Альвареске қазақ және испан тілдерінде қысқа хабарлама жариялады.
«Канело», мен сенің салмағыңа ауыстым! Екеуміздің арамызда әлі шешілмеген мәселе бар!» – деп жазды Әлімханұлы.
Әлімханұлы мен «Канело» арасындағы ықтимал жекпе-жек туралы әңгімелер бұған дейін де айтылып жүрген. Алайда қазақстандық боксшының екінші орта салмаққа ауысуы бұл тақырыпты бұрынғыдан да өзекті етті. Себебі дәл осы дивизионда мексикалық былғары қолғап шебері ұзақ жылдар бойы әлем боксының басты жұлдыздарының бірі саналып келеді.
Дегенмен алдағы бірнеше айда бұл кездесу өтуі мүмкін емес. Әлімханұлы рингке тек бір жылдық дисквалификация мерзімі аяқталғаннан кейін ғана орала алады. Оның жазасы желтоқсан айында аяқталады. Боксшы 2025 жылдың соңында тапсырған допинг-сынамасынан мельдоний табылғандықтан жарыстардан шеттетілген болатын.
Осы жағдайдың салдарынан Әлімханұлы мен WBA тұжырымы бойынша әлем чемпионы Эрисланди Лара арасындағы біріктіру жекпе-жегі өтпей қалды. Соған қарамастан, WBO ұйымы қазақстандық боксшыны чемпиондық белбеуінен айырған жоқ.
Жаза мерзімі аяқталған соң 33 жастағы боксшы кәсіби мансабының жаңа кезеңін екінші орта салмақта бастауды жоспарлап отыр. Кәсіпқой рингте Әлімханұлы әзірге бірде-бір рет жеңілген емес: ол 17 жекпе-жектің бәрінде жеңіске жетіп, соның 12-сін мерзімінен бұрын аяқтаған.
Ал Сауль «Канело» Альварес ықтимал жекпе-жекке чемпиондық белбеулерсіз келуі мүмкін. Бұған дейін мексикалық Теренс Кроуфордтан абсолютті әлем чемпионы атағы үшін өткен кездесуде жеңіліп, барлық титулдарынан айырылған еді.
