Әсем Орынбай Азиада-2026 ойындарындағы екінші медалін жеңіп алды

Әйелдер арасындағы скит сайысының финалында ол 28 ұпай жинап, үшінші орынға ие болды. Алтын медальді Қытай спортшысы жеңіп алса, күміс жүлде Таиланд өкіліне бұйырды. Қазақстанның тағы бір спортшысы Зоя Пискун финалды алтыншы орында аяқтады.

Орынбай үшін бұл – қазіргі Азиададағы екінші медаль. Бұған дейін ол Пискун және Адель Садақбаевамен бірге скиттен командалық есепте күміс жүлдеге ие болған.

Қазақстандық спортшы Азия ойындарындағы жекелей сында қатарынан екінші рет жүлдеге ілігіп отыр. 2023 жылы Ханчжоуда өткен Азиадада Орынбай қола медаль жеңіп алған еді. Сонымен қатар, алдыңғы ойындарда ол әйелдер арасындағы командалық жарыста және Эдуард Ещенкомен бірге аралас жұпта екі алтын медаль иеленген.

Айта кетейік, 2026 жылғы Азия ойындары Жапонияның Айти префектурасы мен оның астанасы Нагояда өтіп жатыр. Жарыс 19 қыркүйекте басталып, 4 қазанға дейін жалғасады.