Бекзат Нұрдәулетовтің әлем чемпионатындағы «алтыны» және Лас-Вегастағы бокс титандарының айқасы: спорт тарихында бұл күн

Қазақстан:

Әлем чемпионатының қазақ-өзбек финалы

2019 – осы күні қазақстандық боксшылар Қамшыбек Қоңқабаев (+91 келі) пен Бекзат Нұрдәулетов (81 келі) Екатеринбургте өткен әлем чемпионатының финалында өнер көрсетті:

Қазақстандық балуан әлем чемпионатында күміс медаль жеңіп алды

2019 – осы күні еркін күрестен қазақстандық балуан Нұрқожа Қайпанов Нұр-Сұлтанда (Астана) өткен әлем чемпионатында күміс жүлдегер атанды. 70 келіге дейінгі салмақта өнер көрсеткен ол финалда ресейлік Давид Баевтан жеңілді. Бұл Қайпановтың әлем чемпионаттарындағы алғашқы медалі болды. Қазіргі таңда балуанның әлем чемпионаттарында үш медалі бар: Нұр-Сұлтан-2019 – күміс, Тирана-2024 – алтын, Загреб-2025 – қола.

Әлем:

Чемпионның соңғы жекпе-жегі

1955 – осы күні әйгілі америкалық боксшы Рокки Марчиано отандасы Арчи Мурды тоғызыншы раундта нокаутқа түсірді. Нью-Йорктегі «Янки» бейсбол стадионында өткен жекпе-жекті 60 мыңнан астам көрермен тамашалады. Марчиано алтыншы раундтан бастап рингте толық басымдық танытып, қарсыласын екі рет нокдаунға түсірді. Осы жеңісінің арқасында Марчиано ауыр салмақтағы әлем чемпионы атағын алтыншы рет қатарынан қорғады. Бұл оның мансабындағы соңғы жекпе-жегі болды. Ол кәсіпқой бокстан жеңілмеген күйде кетіп, 49 жеңіске жетті, оның 43-ін нокаутпен аяқтады.

Автоспорт тарихынан

1986 – осы күні Williams-Honda командасының британдық пилоты Найджел Мэнселл Португалия Гран-приінде жеңіске жетті. Жарыста екінші орынға «Формула-1» бойынша төрт дүркін әлем чемпионы, француз Ален Прост (McLaren-TAG) ие болды. Үздік үштікті бразилиялық Ferrari пилоты Нельсон Пике түйіндеді. Жарыс Эшторил трассасында өтті.

Майкл Спинкстің тарихи жеңісі

1985 – осы күні америкалық боксшы Майкл Спинкс Лас-Вегаста өткен жекпе-жекте өз отандасы, ауыр салмақтағы ұзақ жылдар бойы чемпиондық атағын сақтап келген Ларри Холмсты төрешілердің бірауызды шешімімен жеңді. Қызу айқас 15 раундқа созылды. Осы жеңістің арқасында Спинкс жартылай ауыр салмақтағы чемпиондық белбеуін иеленген әрі ауыр салмақта абсолютті чемпион мәртебесіне қол жеткізген алғашқы боксшы атанды.

Зильке Хернердің рекорды

1988 – осы күні Сеул Олимпиадасында неміс жүзгіші Зильке Хернер 200 метрге брасс әдісімен жүзуде 2:26,71 нәтижесімен алтын медаль жеңіп алып, әлемдік рекорд орнатты. Күміс жүлде қытайлық Хуан Сяоминьге (2:27,49), қола болгариялық Антуанетта Френкьеваға (2:28,34) бұйырды.

«Манчестер Ситидің» ірі жеңісі

2019 – осы күні «Манчестер Сити» Англия чемпионатының алтыншы турында «Уотфордты» 8:0 есебімен ойсырата жеңді. Ойын «Этихад» стадионында өтті. Голдарды Давид Сильва (1-минут), Серхио Агуэро (7), Рияд Марез (12), Бернарду Сильва (хет-трик: 15, 48, 60), Николас Отаменди (18) және Кевин Де Брюйне (85) соқты. Серхио Агуэро пенальтиді дәл орындап қана қоймай, АПЛ-дегі 100-голына да жетті. Бұл ойында Хосеп Гвардиола шәкірттері АПЛ тарихындағы ең ірі жеңіс рекордын жаңарта алмады. 1995 жылы «Манчестер Юнайтед» «Ипсвич Таунды» 9:0 есебімен жеңген болатын.

Макс Ферстаппеннің триумфы

2025 – осы күні нидерландылық автокөлік жүргізушісі, «Формула-1»-дің төрт дүркін чемпионы Макс Ферстаппен (Red Bull) Әзербайжан Гран-приінде жеңіске жетті. Екінші болып Mercedes пилоты Джордж Рассел мәреге жетсе, үздік үштікті испаниялық Карлос Сайнс-кіші (Williams) түйіндеді. Ферстаппен мансабындағы 67-жеңісіне қол жеткізіп, алтыншы рет «Үлкен шлем» иеленді. Яғни ол поул-позицияға ие болып, жарыста жеңіске жетті, ең үздік айналымды тіркеді және барлық айналымда көш бастап отырды. Жарыс Бакудегі қалалық автодромда өтті.

Бұл күні дүниеге келгендер:

1989 – Светлана Ромашина, ресейлік синхронды жүзуші, жеті дүркін Олимпиада чемпионы.

1998 – Ислам Сәтпаев, қазақстандық атқыш. Париж-2024 Олимпиадасының қола жүлдегері.