Бублик әлемнің екінші ракеткасына есе жіберді
Фото: Getty Images
Қазақстандық теннисші Александр Бублик Шанхайдағы «Мастерс» турнирінің 1/8 финалында жеңіліп қалды.
Отандасымыз келесі кезеңге жолдама үшін әлемдік рейтингтің екінші сатысында тұрған германиялық Александр Зверевпен кездесті.
Тартысты өткен матчта теннисшілер үш сет ойнап, екі партияда тай-брейкке дейін жетті. Бублик қарсыласына лайықты қарсылық көрсеткенімен, шешуші сәттерде Зверев басым түсті.
Кездесу 2 сағат 41 минутқа созылды. Нәтижесінде германиялық теннисші 7:6 (8:6), 4:6, 7:6 (7:1) есебімен жеңіске жетті.
Шанхай. ATP. 1/8 финал
Александр Зверев (Германия) – Александр Бублик (Қазақстан) – 7:6 (8:6), 4:6, 7:6 (7:1).
Айта кетейік, матч алдында Зверев ATP рейтингінде екінші, ал Бублик 22-орында тұрған еді. Осылайша, қазақстандық теннисші Қытайдағы турнирдегі өнерін аяқтады.