«Бұл матчтың орны ерекше»: Артета «Арсеналдың» тарихи жеңісіне пікір білдірді
Фото: Getty Images
Лондондық «Арсеналдың» бас бапкері Микель Артета Англия Премьер-лигасының 9-туры аясында «Ливерпульге» қарсы сырт алаңда өткен матчтағы командасының ойынына баға берді.
«Энфилд» стадионында өткен кездесу «канонирлердің» 1:0 есебімен жеңісімен аяқталды.
Испаниялық маман «Энфилдтегі» жеңістің клуб үшін ерекше маңызға ие екенін атап өтті. Лондондық команда Англия чемпионаты аясында бұл стадионда соңғы рет 2012 жылы жеңіске жеткен еді. Артета сондай-ақ «Флитвудқа» қарсы соңғы сәтсіз ойыннан кейін команда алдағы кездесулерге деген көзқарасын өзгерткенін айтты.
«Бұл матч клубымызға қатысы бар әрбір адам үшін ерекше болды. “Энфилдте” 14 жыл бойы жеңіске жете алмау – өте ұзақ уақыт. “Флитвудтан” жеңілгеннен кейін біз болған жағдайдың өзіндік себебі бар деп шештік. Бұл сәтсіздік бізге жеңіске деген құлшыныс қосты. Бүгін команданың көрсеткен ойыны таңғаларлық болды», – деп келтіреді Артетаның сөзін «Арсеналдың» ресми сайты.
Маман өз ойыншыларының қорғаныстағы әрекеттеріне де тоқталды. Оның пікірінше, «Ливерпуль» жылдам шабуылдары арқылы айтарлықтай қауіп төндіргенімен, қонақтар қарсыластың қысымына төтеп бере алды.
«Мені командамыздың қалай төтеп бергені де таңғалдырды. “Ливерпуль” жақсы қарқынмен ойнады. Біз бұл жеңіске лайық болдық. Футболшылар мақтауға тұрарлық», – деді бас бапкер.
Кездесудің тағдырын 16-минутта Кай Хаверц соққан жалғыз гол шешті. Осы жеңістен кейін «Арсенал» АПЛ турнирлік кестесіндегі көшбасшылығын сақтап, ең жақын қарсыласы «Манчестер Ситиден» үш ұпайға ұзап кетті. Ал 15 ұпайы бар «Ливерпуль» бесінші орында тұр.