Данияр Елеусінов алкогольге қатысты мәселелері туралы ашық айтты
Фото: olympic.kz
Олимпиада чемпионы Данияр Елеусінов алкогольге қатысты мәселелері және мансабындағы басты жеңісінен кейін қиын кезеңді бастан өткергені туралы ашық айтты. Қазақстандық боксшы өзін ақтауға тырыспайтынын және қазір алкогольден бас тартуды мақсат етіп отырғанын жеткізді.
Елеусіновтің айтуынша, алкогольге тәуелділік Рио-де-Жанейродағы Олимпиададағы жеңісінен кейін қалыптаса бастаған. Уақыт өте келе бұл әдет күрделі мәселеге айналып, спортшы ол туралы көпшілік алдында айтуға шешім қабылдаған.
«Олимпиададан кейін алкогольге деген әуестігім басталды. Біртіндеп бұл тәуелділікке айналды. Қазір көп адам мені мазақ етеді немесе сынайды. Бірақ мұндай нәрсеге әзіл ретінде қарауға болмайды. Адам өзі басынан өткермейінше, оны түсіну қиын. Мен де кезінде өзгелерге күлетінмін, ал қазір өзім осындай сынақтан өтіп жатырмын. Сондықтан сөзіме абай болғым келеді. Мен оны тастауды мақсат етіп отырмын», – деді Елеусінов.
Боксшы жанкүйерлер тарапынан түрлі пікір болуы мүмкін екенін түсінетінін айтты. Оның сөзінше, мықты мінез бен үлкен спорттық жетістіктер адамның өмірдегі қиындықтарға қарсы иммунитеті бар дегенді білдірмейді.
«Біреу: “Ерік-жігерің қайда?” деп сұрауы мүмкін. Бірақ қанша мықты болсаң да, әр адамның өз сынағы болады. Мен Олимпиада чемпионы болдым, әлем чемпионы атандым, Азия ойындарында жеңіске жеттім. Бірақ өмірімде осындай мәселе пайда болды. Басқа адамның басында мүлде басқа қиындық болуы мүмкін. Сондықтан өзі басынан өткермеген жағдайға тап болған адамды айыптаудың қажеті жоқ», – деп қосты спортшы.
Елеусінов сондай-ақ танымал адамдар өз өмірін тек жеңістер мен әдемі сәттерден тұратындай етіп көрсетпеуі керек екенін атап өтті. Боксшының айтуынша, ол оңалту курсынан өткен және кейбір мәселелерге өзінің кінәсі бар екенін жасырмайды.
«Қазір өз проблемаларың туралы шындықты айту маңызды. Танымал адамдардың да бәрі мінсіз емес – біз де қарапайым адамбыз. Мен бір ай бойы оңалту орталығында болдым. Өз кінәмнен тап болған басқа да жағдайлар болды. Мен үшін ең бастысы – денсаулық пен отбасы, жанымда әйелім мен балаларымның болғаны. Қалғандары бәрібір өз қалағанын айтады», – деді Елеусінов.
Олимпиада чемпионы өзіне айтылған сынға да жауап беріп, өткенінен және спорттағы жетістіктерінен бас тартпайтынын атап өтті.
«Кейбіреулер мені маскүнем деп атайды. Жақсы, атай берсін. Бірақ мен бәрібір Олимпиада чемпионы және әлем чемпионы болып қала беремін. Өз ісіммен айналысуды жалғастырамын және ақталуға тырыспаймын. Мен Головкиннен, Шуменовтан немесе Жақияновтан мықты екенімді дәлелдеуге тырыспаймын. Бұрын мұндай амбициям болды, қазір көп нәрсеге басқаша қараймын», – деді боксшы.
Қиын кезеңге қарамастан, Елеусінов мансабын аяқтауды жоспарлап отырған жоқ. Қазақстандық боксшы өз мақсатына жету үшін АҚШ-қа қайта барып, Zuffa Boxing чемпионы атануды көздеп отыр.
«Мен өз мақсатыма жету үшін Америкаға қайта келдім. Zuffa чемпионы болғым келеді. Біздің спортшыларды қолдаңыздар. Егер қазақстандық жігіт чемпион атанса, оған қуану керек. Адамды төмендету оңай, ал қолдау әлдеқайда маңызды», – деп түйіндеді Елеусінов.
Елеусінов соңғы жекпе-жегін 2025 жылдың шілдесінде АҚШ-та өткізіп, филиппиндік Джеймс Бейконды техникалық нокаутпен жеңген. Кәсіпқой рингте қазақстандық боксшы әлі жеңілген жоқ, оның еншісінде 13 жеңіс бар, оның сегізін нокаутпен аяқтаған.
Бұған дейін Елеусінов 2016 жылғы Олимпиададағы жеңісінен кейін Токио мен Париждегі Олимпиада ойындарына не себепті қатыса алмағанын да айтқан еді. Боксшының сөзінше, оның Олимпиада құрамасына қайта оралуына есімдерін атамаған белгілі бір адамдар кедергі болған.
