Медведев, Бублик және Хачанов Almaty Open-2026 турнирінде ойнайды
Фото: Андрей Ударцев
Қазан айында Алматы тағы да әлемдік теннис турының танымал өкілдерін қабылдайды. 17-25 қазан аралығында Almaty Arena-да ATP 250 санатындағы Almaty Open-2026 турнирі өтеді.
Турнирдің қатысушылар тізімінде Қазақстанның бірінші ракеткасы Александр Бублик, әлемнің бұрынғы бірінші ракеткасы әрі US Open-2021 чемпионы Даниил Медведев, сондай-ақ Олимпиада жүлдегері Карен Хачанов бар. Бұдан бөлек, Александр Шевченко, Лучано Дардери, Томаш Махач, Фабиан Марожан және ATP турының басқа да өкілдері қатысатынын растады.
Турнирдің қазіргі чемпионы – Даниил Медведев. 2025 жылы ресейлік теннисші Алматыдағы финалда жеңіске жетіп, екі жылдан астам уақыттан кейін алғаш рет ATP титулын иеленді. Енді ол Қазақстанға турнир чемпионы мәртебесінде оралады.
Almaty Open негізгі кезеңі 19-25 қазан аралығында өтеді. Іріктеу матчтары 17 және 18 қазанда, ширек финал 23 қазанда, жартылай финал 24 қазанда, ал чемпион 25 қазанда анықталады.
Биылғы Almaty Open турнирі Михаил Кукушкин үшін де ерекше болмақ. 38 жастағы қазақстандық теннисші биыл жазда Алматыдағы өз алаңындағы турнир кәсіби мансабындағы соңғы жарысы болатынын мәлімдеген еді.
Кукушкин 2008 жылдан бері Қазақстан атынан өнер көрсетіп келеді және көптеген жыл бойы ұлттық құраманың көшбасшыларының бірі болды. Оның ATP рейтингіндегі ең үздік көрсеткіші – 39-орын. Сондай-ақ оның еншісінде Санкт-Петербургтегі ATP титулы және Қазақстан құрамасының Дэвис кубогындағы көпжылдық ойындары бар.
Осылайша, Almaty Open-2026 Қазақстандағы күзгі басты теннис додаларының біріне айналып қана қоймай, қазақстандық теннистің танымал өкілдерінің бірі Михаил Кукушкиннің кәсіби мансабындағы қоштасу турнирі болмақ.