Норвегия құрамасының бапкері Бразилияны жеңудің себебін түсіндірді
Фото: ФИФА
Норвегия құрамасының бас бапкері Столе Сольбаккен 2026 жылғы әлем чемпионатының 1/8 финалында Бразилияны (2:1) жеңген матчқа пікір білдірді.
Маман бұл ойынды «Манчестер Сити» мен «Реал Мадрид» арасындағы кездесумен салыстырды.
«Менің ойымша, Норвегияның әрбір азаматы бүгінгі кешке қуана алады. Бұл шын мәнінде өте тартысты матч болды. Ойын кез келген бағытта өрбуі мүмкін еді. Бірақ біз тәртіпті, тактикалық тұрғыдан сауатты ойын көрсеттік. Кейбір доп жоғалтуларымыз бізге қымбатқа түсуі мүмкін еді. Дегенмен жалпы алғанда бәрі біздің пайдамызға шешілді, және біз бұнымен қатты мақтануымыз керек.
Неліктен бәрі сәтті болды? Бұл сәл «Манчестер Сити» мен «Реал» матчы сияқты. Қарсылас қорғаныста ойнап, қарсы шабуылға сенім артады, ал біз оны шаршатуға тырысамыз. Бұл – біздің ең мықты қырымыз, және бүгін біз осы тапсырманы орындадық», – деп Сольбаккеннің сөзін ФИФА келтіреді.
Еске салайық, Норвегия құрамасы өз тарихында алғаш рет әлем чемпионатының ширек финалына шықты. 2026 жылғы әлем чемпионатының 1/4 финалында норвегиялықтар Англия – Мексика жұбының жеңімпазымен кездеседі.
2026 жылғы әлем чемпионаты АҚШ, Канада және Мексикада өтіп жатыр және 19 шілдеде аяқталады.
