«Ордабасы» бас бапкерінің болашағы Қазақстан кубогының финалынан кейін шешіледі
«Ордабасы» ФК
Шымкенттік «Ордабасы» командасының бас бапкері Андрей Мартин клубпен одан әрі жұмыс істеу мәселесі Қазақстан кубогының финалынан кейін шешілетінін мәлімдеді.
Молдова маманы Moldfootball.com порталына берген сұхбатында маусым соңында қызметінен кетуі мүмкін екені туралы ақпаратқа пікір білдірді. Оның айтуынша, клубпен келіссөздер кубоктың шешуші кездесуінен кейін өтеді.
«Менің клубпен келісімшартым 30 қарашаға дейін жарамды. Болашағыма қатысты барлық шешімді кубок финалынан кейін қабылдаймыз», – деді Мартин.
Бұған дейін қазақстандық БАҚ «Ордабасы» клубы маманмен келісімшартты ұзартпауы мүмкін екенін хабарлаған еді. Бұл шешім Қазақстан кубогының финалындағы нәтижеге қарамастан қабылдануы ықтимал.
Андрей Мартин 2024 жылдың желтоқсанында шымкенттік клубтың тізгінін ұстады. Оның жетекшілігімен «Ордабасы» 2026 жылғы Қазақстан Премьер-лигасының чемпионы атанды. Команда 29 турдан кейін 68 ұпай жинады. Бұл клуб тарихындағы екінші чемпиондық атақ. Бұған дейін шымкенттіктер 2023 жылы ел чемпионы болған.
Енді Андрей Мартин шәкірттерін Қазақстан кубогының финалында Қызылорданың «Қайсар» командасына қарсы алып шығады. Кездесу 7 қараша күні Түркістандағы «Түркістан Арена» стадионында өтеді. Матч Астана уақытымен сағат 16:00-де басталады.
Егер «Ордабасы» финалда жеңіске жетсе, клуб тарихында алғаш рет алтын дубль жасайды.