Қазақстандық атқыштар Азия ойындарында командалық скит финалына шыға алмады
Фото: Сали Сабиров
Қазақстанның стенд атудан құрама командасы Жапонияның Айти префектурасы мен Нагоя қаласында өтіп жатқан 2026 жылғы Азия ойындарындағы скит бағдарламасы бойынша аралас командалық жарыстағы өнерін аяқтады.
Әсем Орынбай мен Александр Мұхамедиев іріктеу кезеңінде 134 ұпай жинап, алтыншы орынға ие болды. Финалға үздік төрт команда – Катар, Оңтүстік Корея, Қытай және Үндістан жолдама алды.
Орынбай үшін бұл қазіргі Азия ойындарындағы үшінші жарыс болды. Бұған дейін ол жеке скит бағдарламасында қола медаль, ал Зоя Пискун және Адель Садақбаевамен бірге командалық есепте күміс жүлде жеңіп алған еді.
Ал Мұхамедиев бұған дейін жеке финалда 19 нысананы дәл көздеп, алтыншы орын алған.
Стенд атудан жарыстар 27 қыркүйекте «трап» бағдарламасымен жалғасады.
Еске салайық, 2026 жылғы Азия ойындары Жапонияның Айти префектурасы мен оның астанасы Нагояда өтіп жатыр. Жарыс 19 қыркүйекте басталып, 4 қазанға дейін жалғасады.