Қазақстандық жұп бадминтоннан Азиада-2026 ойындарынан шығып қалды
Фото: Владислав Семенов
Қазақстандық бадминтоншылар Наргиза Рахметуллаева мен Махсут Тәжібуллаев Жапонияның Айти префектурасы мен Нагоя қаласында өтіп жатқан Азиада-2026 ойындарында аралас жұптық сындағы плей-оффтың алғашқы кезеңінен өте алмады.
1/8 финалға шығу үшін қазақстандық дуэт Индонезия өкілдері Амри Сяхнави мен Нита Виолина Марвамен кездесті. Қарсыластар екі партияда да жеңіске жетіп, матчты 2:0 есебімен аяқтады. Осылайша Рахметуллаева мен Тәжібуллаев бұл сайыстағы жарысын тоқтатты.
Айта кетейік, спортшылар бұған дейін де жұп болып өнер көрсеткен. 2025 жылы қазақстандықтар 23 жасқа дейінгі спортшылар арасындағы Орталық Азия чемпионатында аралас жұптық сында жеңімпаз атанды. Сол турнирде Тәжібуллаев ерлер арасындағы жұптық сында күміс, жекелей сында қола медаль жеңіп алса, Рахметуллаева әйелдер арасындағы жұптық сында күміс жүлдегер атанды.
Екі бадминтоншы үшін де микст қазіргі Азиададағы алғашқы жарыс емес. Бұған дейін Тәжібуллаев Қазақстан ерлер құрамасының сапында командалық турнирде өнер көрсетіп, Жапониядан 0:3 есебімен жеңілді. Ал Рахметуллаева әйелдер құрамасымен бірге Үндістаннан 0:3 есебімен жеңілгеннен кейін жарысты аяқтады.
Еске салайық, Азиада-2026 Жапонияның Айти префектурасы мен оның астанасы Нагояда өтуде. Жарыс 19 қыркүйекте басталып, 4 қазанға дейін жалғасады.