Қазақстандық жүзуші Ташкентте рекорд жаңартты
ҚР ҰОК
Қазақстан құрамасының өкілі Ғалымжан Балабек Ташкентте өтіп жатқан жүзуден әлем кубогы кезеңінде 400 метрге еркін стильде жүзуден ұлттық рекордты жаңартты.
Балабек қашықтықты 3 минут 47,13 секундта жүзіп өтіп, 12-орынға ие болды. Бұл нәтиже Қазақстанның жаңа ұлттық рекорды ретінде тіркелді. Жарыс 25 метрлік бассейнде өтіп жатыр.
Бұл бәсекеде америкалық Карсон Фостер 3:37.39 нәтижесімен жеңіске жетті. Екінші орынды бельгиялық Лукас Энво (3:37.74) иеленсе, Оңтүстік Африка Республикасының өкілі Мэттью Колдуэлл (3:40.95) үздік үштікті түйіндеді.
Айта кетейік, Ташкенттегі әлем кубогы кезеңі 8-10 қазан аралығында өтеді. Бұл 2026 жылғы серияның екінші кезеңі. Алғашқы жарыстар 1-3 қазан күндері Бакуде ұйымдастырылса, қорытынды кезең 15-17 қазан аралығында Астанада өтеді.