«Ролан Гаррос» чемпионы US Open-де Тьеннен басым түсті
Фото: Jimmie48
Әлемнің бесінші ракеткасы Мирра Андреева индонезиялық Джанис Тьенді жеңіп, US Open-2026 турнирінің екінші айналымына өтті.
Кездесу 6:2, 6:2 есебімен аяқталып, 1 сағат 9 минутқа созылды. Андреева үш эйс жасап, екі рет қосарланған қателік жіберді және өзіне берілген төрт брейк-пойнттың барлығын пайдаланды. Тьен бір эйс жасап, екі қосарланған қателікке жол берді және қарсыласының добын қабылдауға мүмкіндік беретін бірде-бір брейк-пойнтқа ие болмады.
Айта кетейік, Андреева «Ролан Гаррос-2026» турнирінің қазіргі чемпионы. Оның US Open-дегі ең үздік нәтижесі – 2024 жылы үшінші айналымға дейін жетуі.
Ресейлік теннисші өзара кездесулерде 2:0 есебімен алда келеді. US Open-ге екі апта қалғанда Андреева Цинциннатида өткен WTA-1000 турнирінде Тьенді 6:1, 7:6 (7:5) есебімен жеңген болатын.
Екінші айналымда Андреева германиялық Ева Лиспен (WTA рейтингінде 98-орын) кездеседі. Бұған дейін теннисшілер өзара ойнамаған.