Сәтпаев «Челсиде» Хаби Алонсоның жетекшілігімен алғашқы жаттығуын өткізді
Фото: f.c.kairat
Қазақстандық шабуылшы Дастан Сәтпаев «Челси» клубының жаңа бас бапкері Хаби Алонсоның жетекшілігімен өткен алғашқы жаттығуға қатысты.
Лондондық клуб испаниялық маманның алғашқы жаттығуынан фотосуреттер жариялады. Сол кадрларда Қазақстан құрамасының 17 жастағы шабуылшысы да көрінеді. Сәтпаевпен бірге Коул Палмер, Жоау Педру, Эстевао, сондай-ақ команданың жаңа ойыншылары Эммануэль Эмега мен Жеовани Кенда жаттықты.
«Челси» ойыншылары демалыстан кейін Кобхэмдегі жаттығу базасына оралды. Жазғы үзілістен кейін олар алғаш рет осы жерде жиналды. Жаттығу басталар алдында футболшылар медициналық тексерістен өтті, содан кейін Хаби Алонсо командамен танысып, лондондық клубтың бас бапкері ретіндегі алғашқы жаттығуын өткізді.
Сәтпаевтың өзі «Челси» сапына 1 шілдеде келіп, жаңа маусымға дайындықты ертерек бастап, командаға бейімделуді қолға алған.
Еске сала кетейік, Дастан Сәтпаевтың «Челсиге» ауысатыны 2025 жылы белгілі болған еді. Сол кезде ағылшын клубы трансферді ресми түрде рәсімдеген. Алайда ол кезде қазақстандық ойыншы 16 жаста болғандықтан, тараптар оның кәмелет жасына толуын күтуге келіскен. 2026 жылдың 12 тамызында Сәтпаев 18 жасқа толады, содан кейін ол лондондық клубпен ресми келісімшартқа қол қоя алады.
