Серена Уильямстың Стамбұлдағы жеңісі мен Хэмилтонның Мексикадағы триумфы: 27 қазан тарихта

Автоспорт тарихындағы айтулы оқиғалар

1963 жыл – британиялық Джим Кларк Lotus-Climax көлігімен Мексика Гран-приінде жеңіске жетті. Екінші орынды австралиялық Джек Брэбем иеленсе, үздік үштікті америкалық Ричи Гинтер түйіндеді. Жарыс Мехикодағы ағайынды Родригестер атындағы трассада өтті.

2013 жыл – Red Bull Renault командасының неміс пилоты Себастьян Феттель Үндістан Гран-приінде мәреге бірінші болып жетті. Екінші орынды Нико Росберг, үшінші орынды Ромен Грожан иеленді. Жарыс Үндістанның солтүстігіндегі Будда халықаралық автодромында өтті.

2019 жыл – «Формула-1»-дің жеті дүркін чемпионы Льюис Хэмилтон Mercedes командасымен Мексика Гран-приінде жеңіске жетті. Себастьян Феттель екінші, Валттери Боттас үшінші орынға тұрақтады.

Горди Хоудың рекорды

1963 жыл – канадалық хоккей аңызы, Стэнли кубогының төрт дүркін иегері Горди Хоу «Детройт Ред Уингз» сапында ҰХЛ-дың тұрақты чемпионатындағы 544-ші шайбасын соқты. «Монреаль Канадиенспен» өткен кездесуде (4:6) ол отандасы Морис Ришардың рекордын қайталады.

Мехикода Олимпиада ойындары аяқталды

1968 жыл – Мексика астанасы Мехикода XIX жазғы Олимпиада ойындары аяқталды. Бұл Латын Америкасында өткен алғашқы Олимпиада болды.

Мехикодағы ойындардың басты оқиғалары:

Мексикалық Энрикета Басилио Олимпиада тарихында ойындардың ашылу салтанатында алауды жағу құрметіне ие болған алғашқы әйел атанды.

Америкалық Боб Бимон мен Дик Фосбери әлемдік рекордтар орнатты.

Медальдар кестесінде АҚШ, КСРО және Жапония құрамалары үздік үштікке енді.

Бокс тарихынан

1973 жыл – мексикалық боксшы Родольфо Гонсалес Лос-Анджелестегі турнирде италиялық Антонио Пудданы техникалық нокаутпен жеңіп, WBC нұсқасы бойынша жеңіл салмақтағы әлем чемпионы атағын қорғап қалды.

2012 жыл – мексикалық Гамалиэль Диас Токиода өткен бокс кешінде жапониялық Такахиро Аоны төрешілердің бірауыздан шығарған шешімімен жеңіп, WBC нұсқасы бойынша екінші жеңіл салмақтағы чемпиондық белбеуді иеленді. Жекпе-жек 12 раундқа созылды.

Шанталь Лангласенің ерекше жетістігі

1974 жыл – француз желаяғы Шанталь Лангласе Францияның Неф-Бризах қаласында өткен жарыста әйелдер марафоны бойынша әлемдік рекорд орнатты. Ол 42 шақырымдық қашықтықты 2 сағат 46 минут 24 секундта жүгіріп өтті.

Серена Уильямстың Стамбұлдағы триумфы

2013 жыл – америкалық теннис аңызы Серена Уильямс Стамбұлда өткен WTA қорытынды турнирінің жеңімпазы атанды. Финалда ол қытайлық Ли На-ны 2:6, 6:3, 6:0 есебімен ұтты.

Уильямс бұл турнирде бес рет – 2001, 2009, 2012, 2013 және 2014 жылдары жеңіске жеткен.

Энтони Смиттің жарқын жеңісі

2018 жыл – америкалық ММА файтері Энтони Смит Канадада өткен UFC Fight Night 138 турнирінде швейцариялық Волкан Оздемирді үшінші раундта тұншықтыру әдісімен жеңді. Жартылай ауыр салмақтағы жекпе-жек кештің басты оқиғасы болды.

27 қазанда әлемде қандай күндер аталып өтеді?

Халықаралық ойыншық аю күні.

Дүниежүзілік аудиовизуалды мұра күні.

Тарихтағы өзге оқиғалар

1901 жыл – Мәскеуде Сергей Рахманиновтың фортепиано мен оркестрге арналған екінші концерті толық нұсқада алғаш рет орындалды.

1904 жыл – Нью-Йорк метрополитені ашылды.

27 қазанда дүниеге келгендер

1914 жыл – Ахмет Киреччи, түрік грек-рим және еркін күрес шебері. Ол 1936 жылғы Берлин Олимпиадасында қола, 1948 жылғы Лондон Олимпиадасында алтын медаль жеңіп алған.

1991 жыл – Ислам Махачев, ресейлік ММА файтері, UFC-дің жеңіл және жартылай орта салмақ дәрежелеріндегі бұрынғы чемпионы. Ол UFC тарихында екі түрлі салмақ дәрежесінде чемпиондық белбеу иеленген ресейлік алғашқы спортшы болды.