Штеффи Граф дәуірінің соңы және Марлон Вераның жарқын нокауты: спорт тарихында бұл күн

Швеция алғаш рет Олимпиада чемпионы атанды

1948 жыл – осы күні Лондонда өткен Олимпиада ойындарының футбол турнирінің финалында Швеция құрамасы Югославияны 3:1 есебімен жеңіп, алтын медаль иеленді. Матчқа қатысты бірнеше қызықты дерек бар:

Швеция құрамасын Олимпиададағы жеңіске Рейнор Джордж бастаған. Оның жетекшілігімен команда 1950 және 1958 жылдардағы әлем чемпионаттарында қола және күміс медальдарға ие болды. Сондай-ақ 1952 жылы Хельсинкиде өткен Олимпиада ойындарында қола жүлдегер атанды.

Дәл Лондон Олимпиадасында швед футболының әйгілі «Гре-Но-Ли» үштігі алғаш рет танылды. Оның құрамында Гуннар Грен, Гуннар Нордаль және Нильс Лидхольм болды. Кейін үшеуі де «Милан» сапында өнер көрсетіп, 1950/51 жылғы маусымда италиялық клубпен бірге скудетто жеңіп алды.

Швеция құрамасында үш бір туған ағайынды – Гуннар, Бертиль және Кнут Нордаль ойнады.

Ронни Петерсон қайтыс болғаннан кейін Формула-1 вице-чемпионы атанды

1978 жыл – осы күні швециялық Lotus-Ford командасының пилоты Ронни Петерсон Австрия Гран-приінде жеңіске жетті. Екінші орынға Tyrrell-Ford командасының француздық гонщигі Патрик Депайе жайғасса, үздік үштікті Ferrari сапындағы канадалық Жиль Вильнев түйіндеді. Жарыс Остеррайхринг тас жолында өтті.

Бұл Ронни Петерсонның Формула-1-дегі соңғы жеңісі болды. Сол жылдың қыркүйегінде Италия Гран-приіндегі жаппай апаттан кейін ол екі аяғынан ауыр жарақат алып, ауруханаға жеткізілді. Алайда жарысқа байланысты асқынулар салдарынан көз жұмды.

Маусым қорытындысы бойынша Петерсон 51 ұпай жинап, қайтыс болғаннан кейін Формула-1 вице-чемпионы атанды.

Бокс тарихынан

1983 жыл – осы күні америкалық боксшы Милтон Маккрори Лас-Вегаста өткен турнирде британдық Колин Джонсты реваншта төрешілердің бөлінген шешімімен жеңіп, WBC нұсқасы бойынша жартылай орта салмақтағы чемпион атанды. Титул үшін жекпе-жек 12 раундқа созылды.

Маккрори мен Джонстың WBC титулы үшін алғашқы кездесуі наурыз айында өткен еді. 12 раундқа созылған тартысты жекпе-жекте жеңімпаз анықталмады. Нәтижесінде төрешілердің бөлінген шешімімен тең нәтиже тіркелді.

Болашақ Формула-1 чемпионы Венгрия Гран-приін жеңіп алды

1989 жыл – осы күні Ferrari командасының британдық пилоты Найджел Мэнселл Венгрия Гран-приінде жеңіске жетті. Мәре сызығын екінші болып McLaren-Honda сапындағы бразилиялық Айртон Сенна кессе, үшінші орынға Williams-Renault командасының бельгиялық гонщигі Тьерри Бутсен жайғасты. Жарыс Будапешттегі Хунгароринг тас жолында өтті.

Найджел Мэнселл Формула-1-де үш рет вице-чемпион (1986, 1987, 1991) атанып, 1992 жылы әлем чемпионы болды.

Штеффи Граф мансабын аяқтайтынын жариялады

1999 жыл – осы күні 1988 жылғы «Алтын Үлкен дулыға» иегері, аты аңызға айналған неміс теннисшісі Штеффи Граф кәсіби мансабын аяқтайтынын мәлімдеді. Гейдельбергтегі баспасөз мәслихатында спортшы теннис ойнаудан бұдан былай ләззат алмайтынын айтты.

Штеффи Граф рекордтық сегіз маусым бойы әлемнің бірінші ракеткасы атанды. Мансабы барысында теннисші 21 миллион АҚШ долларынан астам жүлде қорының иесі болды. Әйелдер теннисіндегі бұл рекордтық көрсеткіштен 2007 жылы америкалық Линдсей Дэвенпорт озды.

Льюисті нокаутқа түсірген боксшы титулдық жекпе-жекте жеңіске жетті

2005 жыл – осы күні америкалық боксшы Хасим Рахман Чикагода өткен бокс кешінде отандасы Монте Барретті төрешілердің бірауызды шешімімен жеңіп, WBC нұсқасы бойынша аса ауыр салмақтағы уақытша чемпион атанды. 12 раундқа жоспарланған жекпе-жек толық қашықтыққа созылды.

Барретпен жекпе-жектен кейін Рахман WBC-дің толыққанды чемпиондық белбеуі үшін Виталий Кличкомен кездесуі керек еді. Алайда Кличко жарақатына байланысты мансабын аяқтады. Осыған байланысты WBC басшылығы Рахманды толыққанды чемпион мәртебесіне көтерді.

Қызықты дерек:

2001 жылы аутсайдер саналған Хасим Рахман сол кездегі әлем чемпионы Леннокс Льюисті бесінші раундта сенсациялық түрде нокаутқа түсіріп, WBC, IBF және IBO белбеулерін жеңіп алды. Алайда реваншта Рахман төртінші раундта нокаутқа түсіп, барлық чемпиондық белбеулерінен айырылды.

Марлон Вера UFC-дің бұрынғы чемпионын нокаутқа түсірді

2022 жыл – осы күні Сан-Диегода өткен UFC Fight Night турнирінде эквадорлық Марлон Вера америкалық промоушеннің жеңіл салмақтағы бұрынғы чемпионы Доминик Крузды екінші раундта нокаутқа түсірді.

Бұл жеңісі үшін Марлон Вера «Кештің үздік өнері» номинациясындағы ақшалай сыйлыққа ие болды.

Осы күні дүниеге келгендер

1976 жыл – Роман Яковлев, ресейлік волейболшы, 2000 жылғы Сидней Олимпиадасының күміс жүлдегері.

1977 жыл – Майкл Клим, австралиялық жүзгіш, 2000 жылғы Сидней Олимпиадасының екі дүркін чемпионы және 1996 жылғы Атланта Олимпиадасының қола жүлдегері.