Софья Берульцеваның Азия ойындарындағы алтыны және Орловскийдің жарқын нокауты: 7 қазан тарихта

Қазақстан

Азия ойындарындағы қазақстандық спортшылардың жүлде жаңбыры

2023 жыл — осы күні қазақстандық спортшылар Қытайдың Ханчжоу қаласында өткен Азия ойындарында бірнеше медаль жеңіп алды.

Каратист Софья Берульцева 68 келіге дейінгі салмақта алтын медаль иеленді. Финалда ол Непал өкілі Арика Гурунгтен 3:0 есебімен басым түсті. Берульцеваның қоржынында Токио-2020 Олимпиадасының қола медалі де бар.

Анастасия Ананьева ескек есу слаломынан күміс медаль жеңіп алды. Ол каноэ бағдарламасында 119,29 секунд нәтиже көрсетіп, екінші орынға ие болды.

Гимнасттар Эльжана Таниева мен Милана Парфилова жеке көпсайыста күміс және қола медаль еншіледі. Таниева 130,700 ұпай жинап, екінші орын алса, Парфилова 130,050 ұпаймен үшінші болды.

Каратист Дидар Амirali 67 келіге дейінгі салмақта қола жүлдеге ие болды. Ол ирандық Заде Махдиді 7:2 есебімен жеңді.

Әлем

7 қазан — автоспорт тарихындағы айтулы күн

1984 жыл — атақты француз автокөлік жарысының шебері, Формула-1-дің төрт дүркін чемпионы Ален Прост (McLaren-TAG) Еуропа Гран-приінде жеңіске жетті. Екінші орынға италиялық Микеле Альборето (Ferrari), үшінші орынға бразилиялық Нельсон Пике (Brabham-BMW) ие болды. Жарыс Нюрбургринг тасжолында (ГФР) өтті.

2007 жыл — финляндиялық Кими Райкконен (Ferrari) Қытай Гран-приінің жеңімпазы атанды. Екінші болып испаниялық Фернандо Алонсо (McLaren-Mercedes), үшінші болып бразилиялық Фелипе Масса (Ferrari) мәреге жетті. Жарыс Шанхай халықаралық автодромында өтті.

2012 жыл — неміс автокөлік жарысының шебері, Формула-1-дің төрт дүркін чемпионы Себастьян Феттель (Red Bull-Renault) Жапония Гран-приінде жеңіске жетті. Екінші орынға бразилиялық Фелипе Масса (Ferrari), үшінші орынға жапониялық Камуи Кобаяси (Sauber-Ferrari) жайғасты. Жарыс Судзука қаласындағы аттас тасжолда өтті.

Криштиану Роналдудың алғашқы голы

2002 жыл — осы күні Криштиану Роналду кәсіби мансабындағы алғашқы голын соқты. Португалияның «Спортинг» клубында ойнаған Роналду «Морейренсе» командасына қарсы матчтың 33-минутында есеп ашты. Ал 95-минутта тағы бір гол соқты.

Роналду «Спортинг» сапында барлығы 30 матч өткізіп, бес гол соқты және бір нәтижелі пас берді.

Орловскийдің жарқын нокауты

2005 жыл — беларусьтік ММА шебері Андрей Орловский америкалық Пол Буэнтеллоны бірінші раундта нокаутқа жіберіп, UFC-дің ауыр салмақтағы чемпиондық атағын қорғады. Жекпе-жек АҚШ-тың Коннектикут штатындағы Монтвилл қаласында өткен UFC 55: Fury турнирінде ұйымдастырылды.

Орловский қарсыласын небәрі 15 секундта нокаутқа түсірді. Бұл нәтиже UFC тарихындағы титулдық жекпе-жектердегі ең жылдам нокауттардың бірі саналады.

Николай Валуевтің жеңісі

2006 жыл — ресейлік боксшы Николай Валуев америкалық Монте Барретті 11-раундта техникалық нокаутпен жеңіп, WBA нұсқасы бойынша ауыр салмақтағы чемпиондық белбеуін қорғады. Бұл Валуевтің титулын екінші рет қорғауы еді.

Боксшылардың салмақ айырмашылығы 47,9 келіні құрады. Жекпе-жек алдында Валуевтің салмағы 148,8 келі, ал Барреттің салмағы 100,9 келі болды. Кездесу АҚШ-тың Иллинойс штатындағы Allstate Arena аренасында өтті.

Тони Фергюсонның чемпиондық жекпе-жегі

2017 жыл — америкалық ММА шебері Тони Фергюсон отандасы Кевин Лиді үшінші раундта тұншықтыру әдісімен жеңіп, UFC-дің жеңіл салмақтағы уақытша чемпиондық белбеуін иеленді. Фергюсон мен Лидің жекпе-жегі Лас-Вегаста өткен UFC 216 турнирінің басты кездесуі болды.

Әлем тарихындағы маңызды оқиғалар

1920 жыл — алғашқы 100 әйел Оксфорд университетіне қабылданды.

1959 жыл — кеңестік «Луна-3» ғарыш аппараты Айды алғаш рет айналып ұшты. Аппарат Айдың Жерден көрінбейтін бетінің алғашқы фотосуреттерін түсіріп, суреттерді Жерге жеткізді.

Бұл күні дүниеге келгендер

1983 жыл — Максим Траньков, ресейлік мәнерлеп сырғанаушы және жаттықтырушы. Сочи-2014 Олимпиадасының екі дүркін чемпионы (Татьяна Волосожармен жұптық сында).

1987 жыл — Еркебұлан Шыналиев, қазақстандық боксшы, 2008 жылғы Бейжің Олимпиадасының қола жүлдегері.