Тимофей Скатов Алматыдағы турнирдің алғашқы кезеңінен өте алмады
Фото: Getty Images
Қазақстандық теннисші Тимофей Скатов Алматыда өтіп жатқан ATP 250 турнирінің алғашқы айналымында жеңіліп қалды.
Әлемдік рейтингте 201-орында тұрған Скатовтың қарсыласы ATP рейтингінде 64-сатыда орналасқан венгриялық Фабиан Марожан болды. Рейтингтегі айырмашылыққа қарамастан, қазақстандық теннисші қарсыласына лайықты қарсылық көрсетті. Алайда кездесудің нәтижесін өзгерте алмады.
Алғашқы сетте Марожан 7:5 есебімен жеңіске жетті. Екінші партияда теннисшілер тай-брейкке дейін жетіп, онда да венгриялық спортшы басым түсті. Матч 7:5, 7:6 есебімен Марожанның пайдасына аяқталды. Кездесу 2 сағат 7 минутқа созылды.
Almaty Open. ATP 250. Ерлер арасындағы жарыс. 1/16 финал
Фабиан Марожан (Венгрия) – Тимофей Скатов (Қазақстан) – 7:5, 7:6
Осылайша, Скатов Марожанмен өткізген үш кездесудің үшеуінде де жеңіліс тапты.
Енді венгриялық теннисші турнирдің екінші айналымында Қазақстанның бірінші ракеткасы Александр Бубликпен кездеседі.