«Тобыл» Беларусь құрамасының шабуылшысын қатарға қосуы мүмкін
«Локомотив» ФК
Қостанайлық «Тобыл» Беларусь құрамасының шабуылшысы Виталий Лисаковичті сапына қосуы мүмкін. 28 жастағы футболшы қазіргі таңда еркін агент мәртебесінде.
Бұл туралы «Ухо» Telegram-арнасы хабарлады. Соңғы клубы «Торпедо-БелАЗ» болған форвард шілде айында келісімшарты аяқталғаннан кейін командадан кеткен.
Әр жылдары Лисакович мәскеулік «Локомотив», қазандық «Рубин», «Балтика», Солигорскінің «Шахтері», хорватиялық «Рудеш» пен «Вараждин», сондай-ақ словениялық «Целе» клубтарында өнер көрсеткен. Беларусь құрамасы сапында 28 матч өткізіп, 7 гол соққан.
ҚПЛ-дың 19 турында «Тобыл» 22 ұпаймен турнир кестесінде сегізінші орында тұр. Сонымен қатар қостанайлық клуб еурокубоктағы жолын жалғастырып жатыр. Конференциялар лигасының үшінші іріктеу кезеңінде олар сербиялық «Партизанмен» кездеседі.